Jowai, Ïaïong 21:
Ka Dorbar Shnong Khanduli, West Jaiñtia Hills ka la rai ban khang noh ïa ka rung ka mih lyngba ka shnong Khanduli naduh 4 baje jong ka step Sngi Saitjaiñ kat bym pat weng ïa ka khyrdop jong ka Karbi Anglong Autonomous Council (KAAC) ba la buh ha Khanduli.
Haba ïakren bad ki lad pathai khubor u Waheh Shnong Khanduli u Bah Yooshida Nongspung u la ong ki nongshong shnong jong ka thaiñ Khanduli kim dei ban hiar sha Assam ban leit ïa ki jingdonkam jong ki bad ki nong Karbi ruh kim dei ban wan rung sha ka thaiñ Khanduli katba ka KAAC kam pat weng ïa ka ‘signboard’.
U la ong kane ka jingkhang ïa ka leit ka wan, ka rung ka mih jong ki nongshong shnong ka dei namar ba ka Dorbar Shnong Khanduli ka pyrshah ïa ka jingbuh khyrdop khrong khajna ka KAAC hapoh u pud u sam ka Dorbar Shnong.
Kumta u Bah Nongspung u la kyntu ïa ki marjan shnong kum ka Lapangap, Chebnai, Taloo, Umshangïar, Umplu, Saitsama, Mookoiram bad kiwei kiwei ban ïatreilang bad ka Dorbar Shnong Khanduli.
