Shillong, Ïaïong 21:
Ban wanrah jingkylla ha ka synshar ka khadar, u Myntri Rangbah, Conrad K Sangma, ha ka Sngi Thohdieng u la pyntip ba ka sorkar ka don jingthmu ban thung da ki ‘volunteer’ ha man la ki shnong ban tip kum ki ‘Village Volunteer’ bad kine kin long kum ki nongmihkhmat jong ka sorkar ha ki shnong ki thaw bad ki ban ai jingtip sha ka sorkar halor kino-kino ki kam kiba ïadei bad ki shnong.
Ïa kane, u Conrad u la pyntip haba ai jingkren ha ka jingrakhe ïa ka National Civil Services Day kaba 16 lane ka sngi jong ki babu sorkar ha Hotel Pinewood.
U Myntri Rangbah u la ong ba kin don bun ki jingkylla ha ka rukom synshar khadar ha ka jylla ha ki sngi ban wan. “Kawei na ki jingkylla kaba ngi dang pyrkhat ka long ban thung da ki Village Volunteer, bad kine ki Volunteer kin long kum ki nongmihkhmat jong ka sorkar ha ki shnong ki thaw.”
U la ong ba kin don kumba 6,500 ngut ki ‘Volunteer’ ha ki shnong ki thaw bad kine kin ïarap ban ai jingtip sha ka sorkar halor ki jingjia bad kiwei pat ki jingdonkam kiba jia ha ki shnong.
U Conrad u la ong ba kine ki ‘Volunteer’ ki lah ban ai jingtip sha ka sorkar ha ka por ba don ka jingshlei um lane ka jingtwa khyndew, jingthut ha ka bording bad ka jingsam umbam umdih lane ha ka por ba bthei ka ‘transformer’ bad kiwei.
Nalor kata, kine ki ‘Volunteer’ kin long ruh kum ki Banking Correspondent ban ïarap sam ïa ka bai bam tymmen lane ban ïarap ïa ki briew kiba don jingduna ha ki dkhot met lane ban ïarap pynpoi ïa ki skhim sorkar ha man ki thliew ïing.
Shuh shuh u Conrad u la kren halor ka jingdonkam ban pynkhlaiñ bad ai bor ïa ki Gram Sevak kiba don ha ki Block bapher-bapher.
Hashwa jong kane, u Conrad u la kyntu ïa ki babu sorkar ba kim dei ban ailad ïa ka bor lane ka pisa ne kiwei pat ki jingpynshoi ba kin ïalam ïa ki, hynrei ban pynleit jingmut beit thik kumno ban shakri ïa ki paidbah. U la ai khublei ruh ïa ki babu sorkar kiba la noh synñiang bad trei shitom na ka bynta ka jylla.
U la kyntu ruh ïa ki babu sorkar ba kin trei kum ka kynhun. “Haba ngi don ha ka kynhun, ngi donkam ban burom bad shaniah markylliang bad ban ïarap markylliang khnang ba ki kam kin ym pulom,” u la ong.
