Shillong, Ïaïong 21:
U Myntri ka tnat PHE, u Marcuise Marak u la ong ba ka tnat ka la shim ki lad ki lynti katba lah ban weng ïa ka jingeh namar ka jingduna um ha nongbah Shillong, kaba la jia namar ki don ki jingthut ha ki pipe um bad ka jingmih jingeh namar ka jingshna ïa ka 33 KV line.
U la ong ba kane ka jingeh shen yn sa lah ban weng noh.
Namar ka jingrang tyrkhong, une u Myntri u la kubur ba ki don ki projek umbam umdih ka tnat PHE ha Rilum Garo kiba la dep pyntrei, hynrei ym don um namar ba rngat ka tyllong kaba tan ïa ka um.
U la ong ba ka jingkylla ka suiñbneng ha ka pyrthei ka la nang wanrah ka jingkhluit bad wanrah jingeh namar ba ki tyllong um ki shah ktah.
Haba kylli shaphang ka projek pynlang um slap (rain water harvesting) kaba long ka lad ban den um, u Myntri u la ong ba kane ka projek ka dei kaba leh da kiwei ki tnat kum ka soil and water conservation, hynrei u la ong ba ïa kane ka projek, ki riewshimet ruh ki lah ban leh lypa ha ka por ba shna ïing lada ki don lad, namar kan ïarap shikatdei ban pynlang ïa ka um slap.
