Shillong, Ïaïong 23:
Ka projek sam umbam umdih na ka bynta ka nongbah Shillong kaba tip kum ka Greater Shillong Water Supply Scheme (GSWSS) phase-III, kaba la sahteng mynta la palat 12 snem, ka la nang shimpor biang ban pyndep bad ym lah ban tip lano kan sdang treikam ban sam um sha ki nongshong shnong.
Ka Sorkar MDA-I, ha ka por jong u Bah Renikton Lyngdoh Tongkhar kum u Myntri ka tnat PHE, ka la buhthong ban pyndep noh ha u Nohprah, 2022. Phewse, kane ka projek kam shym la urlong kumba la buhthong bad ka dang sahteng haduh mynta.
Ha ka jingshisha, ïa kane ka projek kaba heh, la buh mawnongrim naduh ka 22 tarik Risaw, 2008, bad la buhthong ban pyndep kumba lai snem ei ei, la kumno kumno ha u snem 2011 ne 2012.
Hynrei naduh 2012 haduh mynta, ka la palat 10 snem ba kane ka projek ka la sahteng.
Haba ïakren bad u Myntri ka tnat PHE uba mynta jong ka Sorkar MDA-II, u Marcuise N Marak, u la ong ba ka GSWSS Phase-III ka la dei ban dep noh hynrei ki don khyndiat ki jingeh na ka daw ka jingthut ban pynïaid ïa u pipe um bad mynta dang pyrshang ban pynbeit bad kiba dei trai ïa ka jaka na ka bynta ban pynïaid ïa u pipe um baheh.
U la ong ba ha kaba sdang, la ïakut bad kiba dei trai ïa ka jaka, la kumno kumno tang haba ïadei bad ka jingai kam, hynrei mynta la nang mih shuh kiwei pat ki jingdawa.
Kumta u la ong ba ka Sorkar ka dang thaw lad kumno ban pynbeit ïa kane ka jingeh khnang ba yn lah ban ïoh pyntrei noh ïa ka jingpynïaid ïa ki pipe um ba dang dei ban pynpoi um sha ki jaka pyllang um.
Haba kylli lano yn pyndep lut ïa ka jingthep ïa ki pipe um ban ïoh sam um ha ki bynta ka nongbah Shillong, u Marak u la ong ba ki don ki bynta ba dang sahteng namar ba ka don ka jingshna surok.
Hynrei haba kylli, lano ka Sorkar ka buhthong ban pyndep ïa ka GSWSS Phase-III bad sdang sam um noh, une u Myntri u la ong ba kham kloi katba lah yn ïaleh ban pyndep noh, hynrei ym lah pat ban buh por lypa sa katno kane ka projek kan dang shim por.
