Shillong, Ïaïong 23:
Da ki spah ngut ki dkhot ka Rashtriya Swayamsevak Sangh (RSS) ki la ïashim bynta ban ïaid ha Shillong ha ka Sngi U Blei kaba long kum shi bynta jong ka jingpynkhreh ïa ka jingdap 100 snem ka seng ha ka ri.
Ïa ka RSS la seng ha ka 27 tarik Nailur, 1925, bad kan rakhe ïa ka jingdap 100 snem ha u snem 2025.
Ka phang jong kane ka jingïaid ka long halor ka jinglong kawei bad jingburom lang ïa ki lariti bad ki riti ba bun ha ka ri.
Hapdeng ka jingpynthut ka suiñbneng bad hap slap, ki dkhot ka RSS na kylleng ka Khasi bad Jaiñtia ki la ïashim bynta ha kane ka jingïaid kaba la sdang na Keating Road bad ïaid lyngba ka Khyndai Lad, Them Bijoy, bad mih sha surokbah ha Anjalee Petrol Pump, bad pynkut da ka jingïalang ha madan kaba don ha Garikhana.
Hadien kane ka la don sa ka jingïalang balyngkot ha kaba u nongkren bakongsan u dei u General Secretary ka RSS Khasi Hills, u Bah Pawnamshisha Khongsni.
Ha ka jingkren jong u, u Bah Khongsni u la khot la wer ïa ki samla ka Jylla ban mih shakhmat ban trei bad nohsynñiang na ka bynta ki kam pynroi ha Jylla bad jingmyntoi jong ka ri.
Haba kren shaphang ki kam nohsynñiang kiba ka RSS ka la leh ha ki 50 snem ba la leit, khamtam ha ki thaiñ nongkyndong, u Bah Khongsni u la ong ruh ba ki paidbah ki dei ban peit shabar na ka jingbatai kiba la shna da ki katto katne ki briew pyrshah ïa ka RSS tang ban myntoi maki, hynrei dei ban wad hi dalade ïa ki kam bashisha bad ki jingnohsynñiang kiba la leh da ka RSS.
Une u nongïalam ka RSS ha Khasi Hills, u la kyntu ruh ïa ki dkhot ka RSS ban nang ïai trei da ka jingsngewtynnad bad jingkhlaiñ ha ki, na ka bynta ka dawbah jong ka imlang sahlang khamtam haba pynkhreh ban rakhe ïa ka jingdap 100 snem ka seng ha u snem 2025.
Ha kane ka sngi la donlang ruh kiwei pat ki nongkitkam ka RSS Khasi Hills kiba kynthup ïa u Bah Mani Mawpat uba dei u Zonal Secretary ka RSS Shillong.
