Ka jingsah khongreng ki ïing baduk ha Nongmensong ka buh jingeh ïa ka shnong: Rangbah Shnong

Shillong, Ïaïong 23:

U Rangbah Shnong ka Nongmensong, u Bah Phrang Warjri u la ong ba ka jingpynslem ka sorkar ban phah sah briew kiba la shna kyrpang na bynta ki longïing baduk ha shnong Nongmensong ka la buh jingeh ïa ka shnong namar ka hap ban leit pahara ïa ki briew kiba wan leh kam awria ha ka por mynmiet.

Kane ka jingïakren bad u Rangbah shnong ka dei namar kine ki ïing kiba la sah khongreng bad don kumba saw tylli eiei la dep shna lut, hynrei namar bym pat lah ban bynta sha ki 40 tylli ki longïing ka la pynlong ba kin shu pra bad jaboh kai da ka jingwan shongkai ki briew ha ka por mynmiet ban leh ïa ki kam sniew.

Nalor kine saw tylli ki ïing ba la dep shna da ka tnat Pynroi Sor, ki dang don sa phra tylli kiwei pat kiba la shu ieh khongreng ba pynïeng tang ki païa bad tap slep kiba khlem pat pyndep pura lut ïa ka kam.

Na kane ka jingsah khongreng ki ïing baduk ha Nongmensong ka la pynlong ïa ki briew ban shim kabu ban leh ïa ki kam sniew bad kiwei kiwei.

Haba u nongthoh khubor u la ïoh ban ïakren kyrpang bad u Bah Phrang Warjri, u la ïathuh ba ka jingshna ïing baduk ha Nongmensong ka la sdang naduh u snem 2007 bad la ïoh ban sam nyngkong sha ki longïing baduk ha u snem 2013-2017.

Nangta u la pynpaw ïa ka jinglyngngoh balei ka sorkar kam lah ban sam ïa kine ki saw tylli ki ïing ba la dep shna sha ki longïing baduk haba ki la dep ha u snem 2017 eiei.

U la ong biang ba ka jingpynslem ban sam sha ki longïing baduk ka la buh jingeh ïa ka shnong namar ki hap ban leit pahara man ka por ïa kitei ki ïing namar ki don ki nongtuh kiba leit riehtngen ha ka por mynmiet.

Kumta ka shnong ka kyntu ïa ka sorkar ba kan sam noh sha ki longïing baduk bad pyndep noh ruh ïa kito ki ïing kiba la shu ieh khongreng kiba sah tang ki païa suda.

Nalor kata, u Bah Warjri u la ïathuh ba ha kawei ka ïing lah ban pynrung kumba 16 tylli ki longïing bad baroh kan poi 40 tylli ki longïing na kine ki saw tylli ki ïing kiba la dep shna.

“Lada ka sorkar kan pynrung noh ka hap ban maramot ïa ki ïit kiba la pait, ki paiñkhana, ki kamra kiba la julor bad ki bording” u la ong.

U la pyntip ka sorkar ka la ïoh ban sam sha ki longïing baduk ki la poi palat 404 tylli ki longïing na ki 19 tylli ki ïing kiba la dep shna.

Nalor nangta, u la ïathuh shuh shuh ba ïa kine ki ïing baduk ba la shna da ka tnat Pynroi Sor la ju pynrung ïa ki longïing baduk kiba dei nyngkong na ka shnong Nongmensong, Laitumkhrah bad Pynthor.

Ha kajuh ka por u la pyntip ba la shna ïa kine ki ïing baduk ka long beit tang ïa ki Khasi ym ïa kiwei ki jaitbynriew.