Jowai, Ïaïong 23:
Ka Shad Sukra ba shisien shisnem jong ka Seiñraij Jowai ba la pynlong da Arts & Culture Committee jong ka Seiñraij Jowai ha ki arsngi lynter kaba sdang ha ka Sngi Saitjaiñ da ki jinglehkai sawangka (drama), la pynkut ïa ka ha ka Sngi U Blei halor ka phang “Chaniah Tylli hei mon phi blai, kamwa pynkhroo ïeiwa da dep booh phi ha pyrthai”.
Ha ka Shad Sukra kaba la long ha Ïawmusiang, la wan sakhi lang da u Myntri ka tnat Cooperation, Food Civil Supplies & Consumer Affairs Department, Home Guard bad kiwei u Bah Comingone Ymbon ha ka jingdon lang ki hajar ngut ki paid ki khun Niam Tre ryngkat ki riam ki beit ba iphuh-iphieng.
U President ka Seiñraij Jowai, u Bah O.R. Shallam ha ka jingkren lamkhmat u la ong, ba ïa ka Shad Sukra la pynkhie im ïa ka ha u bnai Nohprah jong u snem 2005 hadien ba ka la duh la dam la kumba 50 snem bad mynta ka jingïaid lynti ka la kynjoh 18 snem.
U la ong ba ïa ka Shad Sukra la pynlong hashuwa ban bet ïa u symbai u phniang ha ki hali ki pynthor kum ka dak ban ai nguh ai dem kyrpang ïa ka Mei Mariang kaba la bsa bad ai bam ai dih ïa ki nongshong shnong.
Mynta ka kynti ka la dei ka pali jong ki nongshong shnong ban ïada bad pynneh pynsah ïa ka mariang, la ong u Bah Shallam. Nangta ha kajuh ka por u la kyntu ban shim ka jingkitkhlieh ban pynjyrngam biang ïa ka mariang da kaba shim ha lade ka jingkitkhlieh ban thung dieng.
“Haba peit ïa ka mariang teng-teng ka pyndiaw namar ba ki lum ki wah ki la synlen lut na ka jingpynjot pathar jong ngi ki briew”, la ong u Bah Coming.
Kumta u la kyntu ïa baroh ban long ki ‘volunteer’ ki ban ïada bad pynneh ïa ki khlaw ki btap bad ban kiar na ka jingthang lum namar ka ktah ïa ki jingthung bad ki jingthaw ba im jong ka mariang.
La pynphuh pynphieng ïa ka Shad Sukra da ki jingshad ba la shim bynta da ki khynnah bad samla shynrang bad kynthei kumjuh ki longkmie ba kynthup ka Seiñraij Jowai, Ïawmusiang, Seintyllilang Ladthadlaboh, Ummulong, Seiñraij Shillong, Loompyrdi Ïongpiah, Loomkynriang, Dulong, Loomīongkjam, Tpep Pale, Seiñraij Raliang, Umshangiar, Chilliangraij bad Panaliar.
Kham ha shuwa kane, ha ka por mynstep ka la don ka jingïalang ha Madan Mynkoi Pyrdi Loompydi Ïongpiah Jowai ha ka jingdonlang u MLA ka Jowai, u Bah Wailadmiki Shylla bad ïoh ki kyntien sneng kyntien khraw na ki ’riew rangbah bad ki jingshad na ki dong bapher-bapher.
La pynshongshit shuh-shuh ïa ka Shad Sukra da ki jingshad ‘Surok Mih Ïaw’ ha kaba baroh ki khun ka Seiñraij Jowai ki la ïa shad ryngkat ki sur ki rwai kiba pynsawa ïa ka shnong ka thaw naduh na Mynkoi Pyrdi haduh ban da poi ha Ïawmusiang.
Katba ha ka por mynmiet pat kaba dei ka bynta kaba khatduh jong ka Shad Sukra ka la don biang ka jingshad pynbyrngia kiba kynthup ïa ka shad ‘Pynjaw’ ka shad ‘Kper Syntu’ na ki dong ki shnat ka Jowai kaba la pynlong ha Mynkoi Pyrdi Loompyrdi Ïongpiah.
