Shillong, Ïaïong 23:
Ka Khun Hynñiewtrep National Awakening Movement (KHNAM) ka la ong ba lada ka Sorkar ka ïeng ban pyntreikam ïa ka Roster System da kaba phai shadien, ka dei ban pyni ïa ki thup buh jingkheiñ kiba tikna bad katkum ki kyndon halor ka jingthung kam.
Na ka liang ka KHNAM ka la phah dorkhas sha u Myntri Rangbah u Conrad K Sangma ban phah tuklar halor kane, ha kaba u la phah lang ruh sha kiwei pat ki seng saiñ pyrthei.
U Vice President ka KHNAM, u Bah Thomas Passah u la ong ba ka Sorkar ka dei ban shim ïa ka MPSC kum ka nongdon bynta kaba kongsan tam ha ka jingpynkhreh ïa kita ki thup buh jingkheiñ naduh ka jingpynmih ïa ka result, bad jingpynbna kiba pyni ïa ka jingbhah kam jong ki kyrtong kiba shahjied ban ïoh kam.
U la ong ba baroh ki tnat treikam ka Sorkar ki dei ban pynkhreh ïa ki ‘Roster Register bad Roster Account’ da kaba kyntiew thik-pa-thik ïa ki jingkheiñ kiba la ai da ka MPSC ne ki bor kiba leh ïa ka jingthung kam.
U la ong ba ka bynta kaba lai ka long ban kiar na ka jingpyni thok ïa ki kam kiba thylli kiba khlem pat lah ban pyndap, bad ban pyntikna ruh ba ki jingkheiñ kiba ïadei bad ki Khasi-Jaiñtia/Garo/ kiwei ki ST kiba ïoh kam na ka bhah kaba 15% kaba dei ka ‘unreserved category’ kim dei ban paw ha ka ‘reserves category’ hynrei ka dei ban paw beit ha ka unreserved category lem bad ki non-tribal.
Hynrei ka KHNAM ka la ong ba lada ym lah ban leh kumtei, bad pyni ïa ki jingkheiñ nadong shadong, ka Sorkar kam dei ban phai shadien ban pyntreikam ïa ka Roster System, hynrei ka dei ban ïaid nangne shakhmat naduh u snem 2023 shaneng.
Kumta u Bah Thomas u la ong ba ka KHNAM ka dawa na ka Sorkar ban pynsangeh shwa ïa baroh ki jingpynbna lait kam khnang ban lait na ki kynrum kynram baroh.
Shuh shuh u la ong ba ki don ruh ki kam kiba khlem ïaid lyngba ka MPSC kiba la thung hi da ki tnat treikam ka Sorkar. Kum kine ki lah ban pynbakla jingkheiñ pynban ha ka jingbhah kam hapdeng kiba dei ban ïoh bhah, namar kane ka lah ban paw pynban ba ki kam kiba khlem pat pyndap baroh shi katta, ki dei ïa kawei ka jaitbynriew kaba dei ban ïoh bhah.
