Perth, ïaïong:
Kawei na ki nongialehkai ba pawkhmat jong ka ri India ka Ankita Shrivastava ha ka jingshimbynta ka jong ka mynta ha ka lympung ialehkai kaba la long ha Perth ka World Transplant Games 2023, katei ka nong-ialehkai ka la lah ban khur haduh 3 tylli ki takma naduh ba ioh mihkhmat ia ka ri sha katei ka lympung ialehkai.
Kane ka nongialehkai, 29 snem, kaba la lah ban ialehkai bha naduh kaba sdang ha katei lympung, ka la lah ban khur ia kawei ka takma Ksiar na ka jing-ialehkai Long Jump da ka jinglah ban kynthih ha ka jingjngai kaba 3.06m bad ar tylli ki takma Rupa ka ioh khur na ka 3,000m Racewalk (Power walk) na ka bynta ki kynthei bad ruh na ka jingialehkai Shot-Putt ha ka jinglah ban kawang ha ka jingjngai kaba 28.31m. Kumba ka long, katei ka lympung ialehkai ka long ka lympung kaba kordor jong ka kam ialehkai bar-ri ia kaba la pynlong da ka Olympics Association, ha kaba ki jing-ialehkai ha ka lympung ki plie ia ka jynkhang na ka bynta kito ki nongialehkai kiba lah shah kylliang/weng (transplant) ha ki dohnud, tor, khyllai, ksang bad kiwei ki bynta jong ki dkhot-met ba shapoh jong u briew.
Kumta ha ka lympung ialehkai jong une u snem ba mynta, katei ka lympung ka la lah ban lumlang ia ki 3,000 ngut ki nong-ialehkai kiba lah shah kylliang/weng (Transplant) ha ryngkat lang bad ka iing ka sem jong ki bad ki nongkyrshan jong ki na ka bynta ban lehkmenlang ia ka sap ialehkai kaba lah ai ha ki. Ha katei ka lympung ialehkai lah sakhi ruh da ki nongshimbynta kiba lah wan na kylleng ki ri ka pyrthei ban ia aireng da ka mynsiem ba shynrang bad ba rhem ha ka lympung. Ha katei ka lympung iakhun, ka Ankita ka la lah ban ialehkai bha bad kaba la lah ruh ban ioh ia ka jaka ha ka thup ba 3 ha baroh ki rynsan ialehkai kiba ka lah shimbynta bad ka jingiaid lynti ka jong ka ha ka tei ka lympung kam shym la long kaba suk ha kaba ka lah hap ban iakhun pyrshah ia ki jingeh kiba bun naduh ka jinglong jingman ka met ka phad bad ki jingsngew-briew kiba don hapoh jong ka na ka bynta ban ioh biang ia ka lynti kaba ka don mynta hadien ba ka la long kaba bit na ka bynta ban ai sngewbha da 74% ia u Liver jong ka na ka bynta ban pyllait im ia la ka jong ka kmie. Ka jingtrei shitom bad ka jingaiti ialade ha ki kam ialehkai khlem pep ka lah pynioh ha ka ia u soh uba bang bad ba thiang.
