Colombo, ïaïong:
Ka Sri Lanka ha ki khyndiat sngi ba la leit, ka la pyntikna ia ka khubor ba la ïohsngew ba ka China ka thmu ban phah pynpoi palat 1,00,000 tylli ki shrieh ba la sdang duh jait. Kane ka long ruh wat hapdeng ka jingpyrshah na ki tnat mariang haba iadei bad katei ka jingthmu jong ka.
Ka tnat ka rep ka riang bad ka tnat mariang jong ka Sri Lanka, ka la iathuh ba kawei ka kompeni China kaba don jingiadei bad ka Zoological Garden hapoh ka ri, ka la phah ban pynpoi ia kitei ki jait mrad sha katei ka tnat na China namar ka jingsdang duh jait jong utei u jait mrad ha China.
Hynrei, la ong ba ka Sri Lanka kan ym lah ban phah lut haduh baroh kattei 1,00,000 ha kajuh ka por shisien phah, hynrei ka Sri Lanka ka mynjur ia katei ka jingpan jong ka China ruh namar ka jing julor bun jong ki jingthung- jingtep bad ka rep ka riang namar ka jingbun palat jong ki shrieh hapoh ka ri. Kumta la ong ba ka Sri Lanka, kan ym phah sha China da kito ki shrieh kiba don ha ki jaka ba la buh kyrpang ban pynneh- pynsah, hynrei yn shim na kito ki jaka rep- jaka riang bad kiba la shu roi satah khlem lah shuh ban synshar ne ban tehlakam.
La ong ba kitei ki jait shrieh ‘Toque Macaque’ ki long kiba jyllei bha hapoh Sri Lank, hynrei ka International Union for Conservation of Nature (IUCN) ka la pynrung ia kitei ki jait shrieh hapoh ka thup jong ki jait mrad kiba la jan duh jait noh syndon.
Ha ka taiew ba la leit, ki Myntri ka Sri Lanka ki la iathuh ba ka China ka la pan kumba 1,00,000 tylli kitei ki jait shrieh, khnang ba yn ioh ban thep pat ha ki 1,000 tylli ki jaka ri mrad ha China.
La ong ba ka Sri Lanka ka kwah ban buh ia kitei ki mrad hapoh ki jaka ri mrad ‘Zoo’ jong lade ruh, namar la ong ba ki tnat ba dei khmih jong ka Sri Lanka ki la dep khang pyrshah ban khaïi ne ban shalan ia kino kino ruh ki jait mrad hynrei katei ka jingpan jong ka China ka leit jia ruh ha kum kane ka por ba ka ri ka dang donkam pisa bha bad ka don ruh hapdeng ka lanot ka kyrduh.
La ong ba ka Sri Lanka ka la pynduh ia katto katne ki jait mrad kiba ka don kynthup naduh ki shrieh, ki klew bad kiwei de ki jait mrad, ha kaba ka la ailad ia ki nongrep ba kin pyniap noh ia ki ynda ki la jyllei palat bad haba ki la pynduh pynjulor ia ki jingthung- jingtep jong ki.
