Shillong, Ïaïong 23:
U Bah Lambokstarwell Marngar un sa shimti biang kum u President uba khatsan jong ka Khasi Students’ Union (KSU) bad u Bah Donald Thabah kum u General Secretary, katba u Biangbor L Paliar kum u Vice-President. Kane ka long hadien ba ki la jop suk ïa kane ka shuki namar bym don kyrtong ba ïakhun.
Kane ka jingshah jied biang kine ar ngut ki nongïalam ka dei hadien ba ka Election Committee ka la dep peit bniah lut ïa ki kot ki sla hadien ba la kut ka jingthep kyrteng ha ki kam bapher bapher.
Ka Election Committee ba la jied da ka Central Executive Committee (CEC) jong ka Khasi Students’ Union (KSU) ban pynïaid ïa ka ilekshon kaba XV sha ka ophis trei kam jong ka KSU na ka bynta ka samoi trei kam 2023-2026, ka la rai ban pynlong ïa ka ilekshon ha ka 06 tarik u Jymmang, 2023 naduh ka por 8 baje mynstep haduh 3 baje janmiet ha Dinam Hall, Jaïaw, Shillong.
Kumta ka Election Committee ka la dep ban bishar lut ïa ki kot ki sla jong baroh ki kyrtong ha ka 22 tarik u Ïaïong 2023, ki ban ïashim bynta ha ilekshon kaba khatsan (15) jong ka Khasi Students’ Union (KSU). Kine harum ki long ki kyrteng jong ki kyrtong ki ban ïashim bynta ha kane ka ilekshon: President Lambok Starwell Marngar (bym don nongïakhun), Vice President Biangbor L Paliar (bym don nongïakhun), General Secretary Donald V Thabah (bym don nongïakhun), Assistant General Secretary ki don saw ngut; kita James Hitler Mawphniang, Reuben A Najiar, Shelkitbok Kharbani, Eddie Malngiang, Organising Secretary ki don lai ngut; kita Raymond Kharjana, Gary N Mawlieh, Samuel Shabong, Education Secretary ki don lai ngut, kita Nangrikupar Malngiang, Richestson Malngiang, Pynkmenlang Samiet, Information & Publicity Secretary ki don san ngut; kita Pynshai Kupar Dkhar, Pynshai Borlang Rani, Sainkupar Syngkli, Melajied Khongbuh, Mekenson Marbaniang, Office Secretary ki don lai ngut; kita Alerick Kharjana, Samuel L Nonglait, Spaindarsing Lyngkhoi, Sports & Cultural Secretary ki don saw ngut; kita Badonbok Malngiang, Cleenstar Shabong, Eric A Nongkynrih, Hopefulborn L Mawnai, Environment Secretary ki don haduh phra ngut; kita Apporlang Thabah, Badonkupar Kharmalki, Basuklang N Khongwar, Dusterwell Lyngdoh, Franky K Pathaw, Lester Nongbet, Mesadapbor Skhembill bad Shiningstar Kharbihkhiew.
Kane ka long katkum ka kyrwoh ba la phah da u Bah Danny M Khyriem, Chairman Election Committee bad Bah Samuel B Jyrwa, Secretary Election Committee Khasi Students’ Union.
