Carolina, ïaïong:
Ha kane ka khubor la ong ba uwei u briew na ka thaiñ North Carolina hapoh United States, u la siat ia kawei ka khynnah 6 snem bad kumjuh ruh ia ka kmie- u kpa jong ka tang namar ka jingleit poi rung jong ka ball ‘Basketball’ sha ka phyllaw iing jong u.
Ia utei u briew la ithuh kum u Robert Louis Singletary, uba la don 24 snem ka rta bad u la leit ban pyndem hi noh ialade hadien ar sngi jong katei ka jingjia.
Watla katta, la ong ba ia katei ka khynnah bad ka kmie jongka, la pyllait mih noh na jaka sumar hynrei u kpa pat u dang don hapdeng ka jingsumar namar ka jingshitom bad jingmynsaw ka la jur.
Na ka liang ki pulit, ki dang pynkhreh ia ki kyndon ban pynngat ia utei u briew katkum ka aiñ namar katei ka jingleh pynkheiñ aiñ jong u ha katei ka jingjia, da ka jingthmu ban shim ia ka jingim jong kitei ki 3 ngut ha katei ka sngi.
Ki para marjan jong katei ka iing, ki la iathuh ba ha katei ka por ba ka bol ka leit sied shapoh ka phyllaw iing jong utei u briew, katei ka khynnah rit ka la pyrshang ban leit rung bad ban shim ia katei ka bol hynrei la ong ba utei u briew u la hylla bad kynhied ia katei ka khynnah bad kumta, uwei na kitei ki khynnah kiba ïalehkai lang badka, u la leit ban pyntip sha u kpa jong katei ka khynnah, kumta utei u rangbah u la leit sha utei u briew bad ong ba um dei ban leh kumtei ne ban pyni bor ia ki khyllung- khynnah namar kim pat tip eiei bad kumta u la khot ban ïakren da kaba jai-jai.
Hynrei ha mar katei ka por ba utei u kpa bad ka kmie ki dang leit ban ïakren bad utei u briew, u la leit rung pynstet sha iing bad wanrah pynban da ka suloi, ha kaba u la siat ia baroh kiba tur sha ka iing jong u bad baroh 3 ngut ki la shu ia mynsaw bad thiah hajuh.
Kumta, ki para marjan ki la iathuh ba kim shym poi pyrkhat ban iohi ia utei u briew ba un siat ia ki namar ym ju don napdeng kitei ki para marjan ki ban leh kumtei khamtam haba dei ia ki kam khyllung- khynnah.
Katei ka khynnah 6 snem, ka la iathuh ba utei u kuli u la leit dei naka bynta jong ka ngab jongka, hadien kata, utei u briew u la siat sa ia u kpa jongka na ki bynta ba shadien jong ka met.
