Jowai, Ïaïong 23:
Ka West Jaiñtia District Sports Association (WJDSA) ka dei kawei na ki synjuk kaba kyntiew ïa ka kam ïalehkai hapoh ka District bad kaba sei bun ki rangïalehkai phutbol. Shen kane ka synjuk kan ïoh sa pdiang ïa ka mang tyngka kaba 25 klur tam na bynta ban pynbit pynbiang ïa ka madan Kiang Nangbah Stadium kaba don ha Ladthadlaboh Jowai.
Ïa kane la kular da u Symbud Myntri Rangbah (SMR) ka Jylla u Bah Sniawbhalang Dhar haba kren ha ka jingïalang pynhap pyrda ïa ka lyngkhuh dap 50 snem ne Golden Jubilee (1972-2022) ka West Jaiñtia District Sports Association (WJDSA) ha ka sngi Saitjaiñ.
U Bah Sniawbhalang Dhar u la tyrwa ruh ïa ka WJDSA, 10 lak tyngka ban pynlong ïa ka lympung ïalehkai Open To All na bynta ban pynsah nam ïa u kpa jong u (L) Kesilroi Pala. Na kane T.10 lak, 5 lak tyngka yn bhah na bynta ka khusnam bad 5 lak tyngka pat na bynta ka jingpynlut ha ka jingpynïaid ïa ka lympung.
U Bah Dhar u la pynpaw ruh ka jingsngew sarong ïa ka rilum Jaiñtia kaba la sei shibun ki khlur ïalehkai kiba paw bad mihkhmat ïa ka Jylla bad ka ri. Nalorkata u la ïaroh ruh ïa ka sorkar MDA ha ka jingïalam jong ka NPP kaba la shimkhia bad kyntiew ïa ka kam ïalehkai hapoh ka Jylla.
U la kitbok kitrwiang bad ïaroh ruh ïa baroh ki dkhot nongkitkam jong ka WJDSA kiba la trei shitom khlem kano kano ka jingsiew ban kyntiew ïa ka kam ïalehkai sports bapher bapher hapoh ka District.
Ha kane ka sngi ka WJDSA ka la pynkup burom ruh ïa ki referee, ki nongïalehkai Athlete, ki rangïalehkai phutbol, ki coach nalorkata la sam ruh ïa ka ‘Posthumous Award’ ne ka khusnam sha ki longïing jong ki nongïalam bad ki dkhot ba la khlad noh jong ka WJDSA.
La pynphuh pynphieng ïa kane ka jingpynkut ïa ka jingrakhe jubilee da ki jingshad jingrwai ba la shim bynta da ka Loompyrdi Ïongpiah, u Manbhauru Sungoh bad ka jingshad mass drill na ka North Liberty Higher Secondary School.
Hashwa kane, u Working President ka WJDSA u Bah EMH Passah u la ïathuh ba ïa ka jinglehkmen Jubilee la sdang naduh ka 26 tarik u Lber 2022 da ki lympung ïalehkai bapher bapher kynthup ka basketball, half marathon, ïasiat khnam bad ki lympung ïalehkai phutbol ha ki kyrdan bapher bapher.
Ïa ka jingïalang la pynïaid da ka Kong D Lyngdoh bad la ïoh ka jingkren ai khublei na u Vice President ka WJDSA u Bah Patrick Lamare bad la pynwai ïa ka jingïalang da ka jingpynhiar ïa ka lama jong ka WJDSA da u kongsan.
