Jowai, Ïaïong 23:
Ka Friends United XI ka la pynliem noh ïa ka Ummulong Sports Club da 1 wiket ha ka lympung ïalehkai kriket kaba la tip kum ka “Open to All Cricket Tournament” ba pynïaid da ka West Jaiñtia Hills District Cricket Association (WJHDCA) ha madan ïalehkai ka shnong Khliehtyrshi ha ka sngi Saitjaiñ.
Kane ka jingkhur nam jop jong ka Friend United XI ka dei lyngba ka jingïa-lehkai bha u Kishan Lyng -doh uba la ïoh ban tied marwei haduh 156 run tang na ki 75 tylli ki bol.
Haba phai sha ka jing-ïakhun, ka Ummulong kaba la tied nyngkong ka la lah ban kamai haduh 265 run na ki 35 over bad hap 7 wiket. U Rejoice Gassah u la tied 123 run bad u Heisniaw-langki Lamare u la tied 44 run.
Katba na ka liang ki nongka-wang bol ka Friends United XI, u Pyrkhat Sari u la khur 3 wiket bad u Shadap u la ïoh 2 wiket.
Haba beh ïa katei ka thong kaba heh, ki nongtied ka Friends United XI ki la lah ban kot ha ka over kaba 33.4 da kaba kamai 268 run bad hap noh 9 wiket bad kane ka la wan ruh lyngba ki 156 run ba la tied da u Kishan.
Ki nongkawang bol ka Ummulong kiba ïoh khur wiket ki dei u Cameo Lamare uba la pynhap 4 wiket bad u Wellmanson u la khur 2 wiket.
Da ka jinglah ban tied haduh 156 run, ka la pynlong ïa u Kishan Lyngdoh ban ïoh khur syndon ïa ka nam ‘Man of the Match’ bad kane ka dei ka sien kaba lai ïa u ban khur ïa kane khusnam ha kane ka lympung.
Da kane ka nam jop ka Friends United XI kala ïoh ban buh jaka ïalade ha ka kyrdan jong ka semi-final na ka pool B bad ka Efty United XI Mynso ruh ka la ïoh rung sha ka semi-final na ka pool A.
