Karachi, ïaïong:
Na ka liang jong ka Pakistan Cricket Board (PCB) ka la wanrah shakhmat mynta ia ka jingtyrwa ba ka kynhun ialehkai kriket ka India ka lah ban ialehkai ha ka lympung Asia Cup ha ka madan kaba long-pdeng. Katba ka Pakistan bad kiwei pat ki kynhun ialehkai ki ban ia aireng ha kane ka lympung ki lah ban shim bynta ha Pakistan kaba dei ka ri ban pynlong ia katei ka lympung ialehkai.
Kumta na ka liang u Najam Sethi u iathuh ba ka synjuk baroh kawei ka la dep ban phah ia katei ka jingtyrwa sha ka Asian Cricket Council (ACC) ha kaba ka Board of Control for Cricket in India (BCCI) ka la kyntait na ka bynta ban leit ialehkai sha Pakistan na ka daw jong ki jingiakynduh jingeh ha kaba iadei bad ki kam sainpyrthei hapdeng ki ar ri. Ka la dawa ruh ban kynriah noh ia katei ka lympung ialehkai Kriket jong ka dewbah- Asia sha kawei pat ka jaka kaba long pdeng (khlem don sha kano kano ka liang jong ki ar ri).
Kumba la dep ban pynbna ha kaba nyngkong hi ka long ba katei ka lympung ialehkai ka ban kynthup ia ki 6 tylli ki kynhun ialehkai jong ki ri kiba marjan bad kiba dang hap hapoh katei ka dewbah, yn pynialehkai naduh ka 2 – 17 tarik u Nailur 2023. Wat la ia ka prokram ialehkai ba thikna bad pura jong ki jingialehkai yn sa pynbna shen na ka daw jong ka jingbym thikna ha kaba iadei bad ka madan ialehkai. Kumta ruh nalor ka kynhun ialehkai na Pakistan bad India, kiwei pat ki ri ki ban wan sha katei ka jingia aireng kin long ka kynhun ialehkai na Sri Lanka, Afghanistan, Bangladesh bad kawei ka kynhun ialehkai ka ban sa pawshe ka kyrteng jong ka na ka ACC Qualifiers naba ka rynsan iaknieh rung sha ka lympung ka dang iaid shakhmat mynta da kaba pynlong ia ka ha Nepal.
U Sethi u iathuh ruh ba ka jingkwah jong ki paidbah katei ka ri ki kwah ba ka kynhun ialehkai jong ka Pakistan ka dei ban ialehkai ia ki jingialehkai bad ka India katkum ki kyndon ba lah buh. Kumta na ka liang jong u Sethi u iathuh ba lada ka Pakistan ka shim ia ka rai na ka bynta ban rah noh ia baroh ki jingialehkai ka India na ka lympung sha ki madan ialehkai ba long-pdeng, ki ri ba Marjan ruh ki dei ban pyndonkam da kajuh ka bynta ha ka por ban pynlong ia ka lympung ialehkai World Cup 50-over ha u bnai Risaw-Naiwieng mynta u snem.
Ka ACC, hapoh ka jingialam jong u Secy ka BCCI u Jay Shah ka pynpaw ba shen kan sa ai ia ka jubab sha ka PCB ha kaba iadei bad katei ka bynta jong ka jingwanrah jong ka mynta ia ka tei ka mat, bad ki kaiphod ki iathuh ba kiwei pat ki dkhot jong ka ACC ruh ki kwah ba ka Asia Cup kan long ha ki madan ialehkai ba-pdeng na ka bynta ban iada na ka jinglut watla ka Pakistan kan dang iaisah kum ka ri ka ban pynlong ia ka lympung.
