Shillong, Ïaïong 23:
U MDC ka Bharatiya Janata Party (BJP), u Bernard N. Marak u la ong ba ka jingdawa ban pynlong nongbah ïa ka Tura ha ka por tlang kan urlong hadien ba la thaw ïa ka Secretariat bad kiwei-kiwei ki tnat treikam Sorkar.
“Ki paidbah ki angnud ban ïohi ïa ka Tura kum ka nongbah ha ka por tlang. Kane kan urlong hadien ba la thaw ïa ka Secretariat bad kiwei-kiwei ki tnat treikam Sorkar ha Tura,” la ong u Marak ha ka kyrwoh.
U la ong ruh ba ha shuwa ka ilekshon, ka BJP ka la sngewthuh ïa ka jingangnud ki paidbah bad ka jingdonkam ban don ïa ka Secretariat ha Tura. Kumta ban pynurlong ïa katei ka mat jingdawa, ka jingdonkam kaba hakhmat eh ka long ban don ïa ki jingtei kiba biang.
Haba pynsngew ba ka BJP ka la tyrwa ïa ka jingtei jong ka Secretariat bathymmai ha Tura ban pynlong ïa ka Dorbar Tlang, u la ong ba wat la ka Sorkar Pdeng ka la pdiang ïa ka Secretariat bathymmai, hynrei ïa ka jingtyrwa dei ban phah da ka Sorkar Jylla.
“Ban pynurlong ïa ka Tura kum ka nongbah ha ka por tlang, u Myntri Rangbah ka Jylla, u Conrad Sangma bad ka Kynhun Myntri jong u ki don ka bynta kaba kongsan ban pynbna bad mynjur ïa ka Tura kum ka nongbah ha ka por tlang kaba nga ngeit ba shen un sa shim ïa kane ka sienjam,” u la ong.
Ka BJP ha ki mat ilekshon jong ka, ka la tyrwa ban tei ïa ka Secretariat ha Tura namar ka tip shai ba ka long kaba donkam ban pynïabiang tara ïa ka bor pynïaid bad ka synshar ka khadar kaba mar katjuh na bynta ki Khasi, Garo bad Jaiñtia, u la Marak.
“Ka Sorkar Jylla ha kane ka kynti ka dei ban shim ka sienjam ban pynbna ïa ka Tura kum ka nongbah Ba-ar,” u la ong.
Utei u MDC u la ong ba ka jingangnud ki paidbah ka long kaei-kaei kaba hakhmat eh ïa ka BJP ha ka por ba pynwandur ïa ki mat ilekshon na bynta ka roi ka par jong ka Jylla.
Shuh shuh u la bynrap ba ka BJP ka pynpaw ka jingsngewnguh ïa ki kynhun kiba la pynsngew halor katei ka mat jingdawa kaba la kyrshan da u Myntri Rangbah, Conrad Sangma bad u MLA, u Saleng Sangma.
