Shillong, Ïaïong 23:
Ka United Democratic Party (UDP) kaba dei ka seng kaba synroplang ban thaw ïa ka sorkar MDA-2 hapoh ka jingïalam ka NPP kam pat kwah ban ïakren eiei kumno ban sei kyrtong ban ïakhun ïa ka ilekshon MP Lok Sabha ka ban long ha u snem 2024. Kane ka dei namar ka seng ka dang pynkhreh ïa ka ilekshon ka ban long ha Sohïong konstitwensi ha ka 10 tarik Jymmang, 2023 ban pynïoh jingjop ïa u kyrtong ka seng.
Haba ïakren bad u Bah Jemino Mawthoh uba dei u General Secretary ka UDP, u la ïathuh ba ïa mynta ka seng kam pat ïakren eiei halor ka ilekshon MP namar ka dang kloi palat namar dang shu kut ka ilekshon MLA.
U la ïathuh ba ka seng mynta ka dang pynkhreh shaid shaid ban wanrah ïa ka jingjop ïa u kyrtong ka UDP Bah Synshar Lyngdoh ha Sohïong konstitwensi.
U la ong ba ka por ban ïakren ïa ka ilekshon MP Lok Sabha ka dang biang ha kine ki bnai ban sa wan.
Na ka liang u President ka UDP Seng kmie, u Bah Metbah Lyngdoh u la kyntu ïa baroh ki MLA ka seng ba ki dei ban hiar lut sha Sohïong konstitwensi na bynta ban wanrah jingjop ïa u kyrtong ka UDP.
Kumta u Bah Metbah u don jingkyrmen ba ka UDP kan ïoh ïa ka jingjop ha Sohïong konstitwensi. Wat la ka la duh noh ïa u kyrtong uba ka seng ka la dep pynbna mynshwa u Bah HDR Lyngdoh uba la khlad noh ha ka 20 tarik Rymphang, 2023, hynrei ka UDP mynta ka la sei da u pyrsa trai u Bah HDR Lyngdoh, u Bah Synshar Lyngdoh.
