Shillong, Ïaïong 24:
Ka All India Movement (AIM) ha ka Lah Sngi U Blei ka 24 tarik mynta u bnai ka la leit ban ai da ka dorkhas ha u Deputy Commissioner ka East Khasi Hills District, u S.C Sadhu, IAS, halor ka jingpyrshah ha kaba ïadei bad ka jingpynlong ïa ka Mela ha Parking Lot, Polo.
Katei ka seng shen kan sa leit ban aiti ruh ïa ka dorkhas sha u Myntri ka tnat Khajna u AT Mondal bad u Myntri Rangbah ka Jylla u Conrad K Sangma ba kin shim khia halor kane ka kam.
Haba kren sha ki lad pathai khubor ha Shillong Press Club, u Bah Banshai Marbaniang uba dei u Chairman jong ka AIM, u la ong ba ka jingpyrshah bad ka jingleit ai jingthoh jong ka seng sha u DC, ka dei namar ba ha katei ka Mela la pynbun tang da ki kam ïa khalai suda kaba la pynlong ba wat ki khynnah skul ruh hadien ba ki la wai na ki jingpule ne ki jingshah hikai jong ki, ki la leit ban pynlut por hapoh katei ka Mela ha kaba don ka jingïakhalai.
Nangta u Bah Marbaniang u la ong, haba ka seng ka la leit sha katei ka jaka ka la lap ba katei ka Mela kam long kum kiwei ki Mela kiba don sha kiwei pat ki bynta jong ka Ri India kaba dap da ki jingpynbyrngia bad ki jingïalehkai na ka bynta ki khynnah. Hynrei, ka Mela kaba la long hapoh Shillong ka la long da kumwei pat ha kaba ki khynnah ki la ïeng ban ïalehkai khalai.
“Haba ki khynnah pule kin hap ban ïakhalai hato ngin kynnoh ïa ki ne ngin kynnoh ïano? Mano ba pynlong ïa kane ka Mela? Haduh mynta ngim tip bad ynda ngi tip ba ïa ka Mela ruh la wan ban pynlong hi da kiba nabar ka jylla bad na ka jylla aïu ruh ngim tip haduh mynta,” la ong u Bah Marbaniang.
Nalor kata, u Bah Marbaniang u la ong, ka jingïoh lad ban pynlong ïa ki kam khalai ha ka Mela ka ktah jur ïa ki khynnah namar kin leit ban ïathong ha ki kam ïakhalai da ka jingmut ban ïoh pisa kham bun. Lada ki khynnah ne ki samla ki ngop ha kitei ki kam khalai kan pynlong ruh ïa ki ban tuh ban thiem.
Shuh shuh u Bah Banshai u la ong ba la ïohi ba ka sorkar jylla barim kata ka Meghalaya Democratic Alliance (MDA) ka la sdang ban pyntreikam ïa ka Gambling Act bad ban wanrah ïa ka ‘Casino’ hapoh ka jylla, hynrei na ka liang ki seng bad ki paidbah ki la ïeng ban wanrah ïa kane ka kam khalai hapoh ka jylla. Pynban ha kane ka sorkar kaba thymmai la ïohi ba ka la pynsangeh noh ban wanrah ïa ka aiñ khalai hapoh kane ka jylla hynrei kaba lyngngoh pat ba ha ki Mela la ïoh ban pynlong ïa ka jingïalehkai khalai.
Kumta na ka liang ka seng lyngba katei ka shithi ka la dawa na u DC ban pynsangeh noh shisyndon ïa ka kam khalai hapoh ka Mela lada thmu ban pynlong nangne shakhmat hapoh ka jylla namar kiba bun ki khynnah bad ki samla kiba leit sha ka Mela ki leit da ka jingthmu ban ïalehkai ïa ki jingïalehkai kiba pynsngewtynnad bad pynmyllen ïa ki ym ban pynngop noh ïa ki ha ki kam khalai.
