Shillong, Ïaïong 24:
Ka Headquarters 101 Area jong ki shipai ryngkew ka Ri India ki la rakhe ïa ka jingdap 60 snem ha ka Lah Sngi U Blei ha Shillong.
Ha kane ka sngi la sdang da ka jingleh burom ïa ki shipai kiba la aiti ïa la ka jingim na ka bynta ka Ri ha Shillong War Memorial, Rhino da u Lieutenant General R.P. Kalita, General Officer Commanding in Chief (GOC-in-C) Eastern Command jong ki shipai India ha ka jingdonlang jong u Major General RK Jha, Officiating General Officer Commanding (GOC) 101 Area bad ki shipai ka Headquarters 101 Area.
La sdang ïa ka Headquarters 101 Area ha ka 22 tarik Ïaïong, 1963 bad ha kato ka por la ju tip ïa ka kum ka 101 Communication Zone. Ka jingsdang ïa kane ka long hadien ka jinghiar thma ki shipai China ïa ka India ha u snem 1962, bad ka jingthmu jong ka 101 Communication Zone ka long ban ai jingkyrshan ïa baroh ki len shipai kiba don ha ka thaiñ Shatei Lam Mihngi.
Hynrei wat la ka long tang ka tnat ban ai jingïarap, ki shipai jong ka 101 Area ki la ïashim bynta ha ki jingïakhun pyrshah ïa ki lehnoh ha Mizoram naduh 1966 haduh 1969. Ha ka thma ban pynlaitluid ïa ka East Pakistan ha u snem 1971, ki shipai ka Headquarters 101 Area ki la ïashim bynta ha ki jingïakhun ha Sylhet bad Mymensingh district bad ki dei kiba nyngkong eh ban poi ha nongbah Dhaka ha ka step jong ka 16 tarik Nohprah, 1971 bad ha ka por mynsngi, ki shipai Pakistan ki la pyndem ïalade. Namarkata, ïa kane ka Headquarters 101 Area la ju khot ruh kum ka ‘First in Dacca’.
Na ka snem sha ka snem, ki shipai ka 101 Area ki la nang pynjanai ïa ka kam ha ka jingai jingïarap ïa kiwei pat ki shipai kiba don ha ki jaka kiba sha kyndong bad ha ki bynta khappud ha ka thaiñ Shatei Lam Mihngi.
U GOC-in-C Eastern Command u la ai khublei ïa baroh ki shipai ka 101 Area namar ka jingtrei shitom na ka bynta ka Ri India.
Ha kane ka sngi, la plie paidbah ruh ïa ki maw dur jong u Major General Gurbaksh Singh Gill bad u Major General Gandharv Nagra, kiba dei ki GOC ka 101 Area ha ka por jong ka thma ha u snem 1971.
Na ka liang u Lt Gen R.P. Kalita u la pdiang ruh ïa ki shipai kiba la ïashim bynta ha ka Rhino Riders Motorcycle Rally ba la pynlong da ka Headquarters 101 Area. Ïa kane ka rally la plie da u Lat ka jylla ha ka 9 tarik Ïaïong 2023.
Kine ki shipai kiba shong da ki thuk-thuk ki la leit sha ki bynta jong ka Meghalaya, Assam, Mizoram, Manipur, Nagaland bad Arunachal Pradesh ha kaba ki la ïakynduh ïa ki samla, ki shipai ba la shongthait bad kiwei.
