Shillong, Ïaïong 24:
U Chief Executive Member (CEM) ka Jaiñtia Hills Autonomous District Council (JHADC) u Bah Thombor Shiwat, u la pynrem jur ïa ka jingkam jong ka Deputy Commissioner (DC) ka West Karbi Anglong ba ka shnong Khanduli ka hap hapoh u pud u sam jong ka Assam.
U CEM ka JHADC u la kynnoh ba kane ka jingkam da ka DC jong ka West Karbi Anglong ka dei ka bym lah ban long namar katkum ka jingtip ka jong u, ka shnong Khanduli ka hap hapoh ka jylla Meghalaya haduh mynta, ha kaba wat ïa ki syrnod ruh la ai da ka JHADC.
“Kane ka jingkam jong ka DC ka West Karbi Anglong ba ka Khanduli ka hap sha Assam, ka long pynban kum ka jingai ding ïa ki nongshong shnong ka Khanduli,” la ong u Bah Thombor bad ha kaba u la bynrap ruh ba ka JHADC ka pynshisha bad pynskhem ba ka shnong Khanduli ka dang hap hapoh ka jingpeit jong ka district council, ka don u Rangbah Shnong ba la ai Sanad da ka council bad ka don u pud u sam katkum jingai bor ka council.
“Ha ka jingshisha na ka liang u DC ka West Jaiñtia Hills dang shen u la khot ïa ka jingïalang bad ka DC na West Karbi Anglong ban ïakren kumno ban wanrah ïa ka jinglong jai jai bad ka shong suk shongsaiñ ha shnong Khanduli bad ki shnong ba marjan, hynrei kane ka DC pat ha ka jaka ban ïaleh ban pynïaid shakhmat ïa ka jingshongsuk kat bym pat dep ka jingïakren pynbeit pud ha ka kylla ba ar, ka la kren ai ding pynban da kaba kam ba ka shnong Khanduli ka hap sha Assam,” la ong u CEM JHADC.
Lah ban pynkynmaw ba na ka liang jong ka Deputy Commissioner ka West Karbi Anglong District ka Krishna Baruah dang shen ka la kam ba ka shnong Khanduli ka hap sha ka jylla Assam kata halor ki kot ki sla ba la wanrah shakhmat da ka Karbi Anglong Autonomous Council (KAAC).
Nalor kata, ha ka 15 tarik mynta u bnai ki la don ruh da ki spah ngut ki nongshong shnong ka Khanduli kiba la khie bitar bad leit jynrat ïa ka signboard ba la pynïeng da ka tnat Khlaw jong ka KAAC na bynta ban lum khajna ha Khanduli.
