Bah Allan Lyndem
Calcutta
Ha kito ki por ba nga dang don kumba 7 snem eiei ka rta, nga kynmaw ba i Bah Sumar Sing Sawian i ju wan sha ïing jong ngi ha Riatsamthiah ban ïakynduh ïa i Papa jong ngi. Ha kita ki por ba i wan kumta, ngi dap da ka jingsngewtynnad bad khleh ruh ka jingsngewphylla ba i ne i briew i ba wan kai ha ïing jong ngi i dei ita i briew i ba ngi ïohsngew ïa ka sur jong i ba i pule khubor Khasi lyngba ka All India Radio (AIR). I Bah Sumar i don ka sur kren (voice) kaba sngew shong khia bad sngew maiñ.
Nga la ju ïoh lad ruh ban ïohi markhmat ïa i Bah Sumar ha ka shlem pule khubor (news-reading room) jong ka AIR ha kito ki por ha kaba ka AIR ka treikam na ka ïing jong ka Guwahati High Court Shillong Bench (hajan MLA Hostel). Ki bun palat ki jingkynmaw ieid ïa i Bah Sumar i ba ngi ju ïohi ruh ïa i kum u nongthoh, u Journalist, u News Correspondent, u Resident News representative.
Lah ban ong ba i Bah Sumar i dei uwei na ki nongthoh khubor napdeng ki Khasi uba rim tam, uba jar jar tam bad uba proh tam. Shisien i Bah Sumar bad U Mr. Khiren Roy – Shillong Resident Editor, The Assam Tribune ki la wan ïashong kai bad i Papa ha ïing ha Riatsamthiah bad ka jingïakhana-khadeh jong ki ka poi palat 5 kynta.
I Bah Sumar i dei i ba rung ba mih bha ha ka ïing jong ngi bad ka jingïadei-kam bad jingïaieid paralok bad i Papa jong ngi ka long kaba ïajan bha. I Bah Sumar i la ju long ruh U Editor jong ka kotkhubor ‘Apphira’ bad nga ju kynmaw ha kito ki por khynnah samla ba i Papa i ju phah ïa nga ban leit ai ki jingthoh (article) sha i Bah Sumar ban shon ha ka kotkhubor jong i.
Lyngba ki por ha ki jingtreikam jong nga, nga la ju trei ha New Delhi. Ngam lah ban klet ïa kito ki por (ha ki snem 1995-96) ba i Bah Sumar i trei bad ka PTI ha New Delhi. Ha kita ki por ba i trei ha Delhi, i Bah Sumar i shong i sah bad nga ha MMTC Compound, Hauz Khas. Shibun kiei kiei kiba nga la ïohlum jingtip na i Bah Sumar shaphang ka ka kam thoh khubor bad kawei kaba nga ïoh jingsngewthuh bha na i ka long-baroh ki journalist ki lah ban long reporter, hynrei ym baroh ki reporter ki donkam ban long journalist (all journalists can be reporters, but not all reporters are required to be journalists).
Ai ba ka mynsiem i Bah Sumar Sing Sawian kan shongsuk ha ka Ri Basuk U Nongbuh Nongthaw.
Ki Jingkynmaw Ieid ïa i Bah Sumar.
