Shillong, Ïaïong 24:
Ka jingkwah u Bah A.L Hek ban wan ïasoh noh ki MLA ka Trinamool Congress (TMC) ha Meghalaya bad ka BJP ka la nang paw pyrthei, ha kaba u la kam ba ka la don ka jingïadihsha jong u bad ki ar ngut ki MLA ka TMC, kita u Bah Charles Pyngrope bad u Dr Mukul Sangma, bad la ïoh ruh ban ïakren shaphang ka jingïasoh noh bad ka BJP, tangba ki la ong ba kin sa peit shwa.
Ha ka jingshisha, ka TMC ka kham khlaiñ ban ïa ka BJP ha Meghalaya ha kane ka ilekshon MLA, 2023, da kaba jop kham bun ngut ki MLA ban ïa ka BJP.
Ka TMC ka ïoh 5 ngut ki MLA ha kane ka ilekshon, 2023, hynrei ka BJP ka ïoh tang 2 ngut ki MLA, kaba long kumjuh kumba ka jop tang 2 ngut ha ka ilekshon MLA, 2018.
Hynrei ka khubor ka la nang sawa ba ki MLA ka TMC ki la kwah ban leit ïasoh bad ka BJP, ha kaba u Bah Hek, uba long u nongïalam ka BJP ha Meghalaya u la kubur ba ka la don ka jingïadihsha bad u Bah Charles Pyngrope bad u Dr Mukul bad la ïoh ban ïakren shaphang ka jingïasoh bad ka BJP.
U Bah Hek uba dei u Myntri ka Sorkar MDA-II u la ong, “nga la ïoh ban ïa dihsha bad ki ha kaba la ïakren ruh shaphang ka jingïasoh noh bad ka BJP, bad ki ruh ki la ong ngim sngew ei ei ïa kata, tangba ngin sa peit shwa.”
U Bah Hek u la ong ba u Dr Mukul u khlem ong em ne hooid, hynrei un hap peit shwa, ha kaba u la bynrap ba ym dei ba ka BJP ka leit khroh ïa ki MLA ka TMC ne ki MLA ka TMC ki khroh ïa ka BJP.
U Bah Hek u la ïaroh ruh ïa u Bah Charles bad Dr Mukul ba ki dei ki nongïalam kiba la kham rim bad lada ki ïasoh bad ka BJP, kan nang kyntiew ïa ka BJP.
U la ong ruh ba lada u Dr Mukul un wan sha ka BJP kan don bha ka lad ïa u.
Haba kylli la u ïohi ba ka jingleit u Dr Mukul sha TMC ka dei ka jingbakla naduh basdang, u Bah Hek u la ong ba um nud ban ong ïa kata, ba ka bakla ne em, hynrei kan long kaba dei eh ïa u Dr Mukul lada u wan sha ka BJP, bad kan long ka jingbha ïa u.
Haba kylli, la ma u kum u nongïalam ka BJP, u la dep rah ban ïakren shaphang kane bad ki nongïalam ka BJP ha Delhi, u Bah Hek u la ong ba lada khlem pat pynskhem ïa ka jingïakren ba kin rung, um pat lah ban shu leit ïakren ne pynsngew sha ki nongïalam ka BJP ha Delhi.
