Shillong, Ïaïong 24:
U Myntri ka tnat PHE u Marcuise N Marak u la ong ba ka jingkynnoh ba u pynkheiñ ïa ka ‘model code of conduct’ da kaba u sam ïa ka kaiphod treikam jong u ha ki san snem, kam don nongrim bad kane ka long ka jingpynjah burom ïa u.
U Marak uba dei u MLA ka NPP na Williamnagar konstitwensi, u la ong ba lada um pyni ïa ka kaiphod treikam jong u ruh yn sa don kiba dait, bad haba u pyni shah kynnoh ba u pynkheiñ ïa ki kyndon ilekshon.
“Haba nga pyni ïa ka kaiphod treikam jong nga kum u MLA, ka dei ka kamram jong nga ban pyni paidbah, bad ngam shym la ong ïa ki paidbah ban vote ïa nga ha kata ka kaiphod,” la ong u Marak.
U Marak u la ong ba kum u MLA ha ka samoi barim, u la pyrshang ban trei na ka bynta ki paidbah ha ki san snem ba la dep, bad ki paidbah ki bishar hi ïa kata.
Dang shen ka don ka jingujor pyrshah ïa u Marcuise Marak kum u MLA ka Williamnagar, bad dawa ban mait kyrteng noh ïa u namar ba u la pynkheiñ ïa ki kyndon aiñ.
