Shillong, Ïaïong 24:
U Myntri ba peit ïa ka tnat ri dohkha, u Bah A.L Hek u la kam ba ka Jylla ka dang shaniah 80 na ka 100 (80%) ban ïoh dohkha na shabar, hynrei u khlem nud pat ban kubur ba ka State Aquaculture Mission kaba pyntreikam ha Jylla ban pynmih dohkha, ka la pulom bad kam lah bha ban pynmih dohkha lyngba ki pung dohkha kiba la shna lyngba kane ka skhim.
Ki nongthoh khubor ki la buh jingkylli ïa u Bah Hek, balei ka Meghalaya kam lah ban pynmih dohkha hi nalade wat hadien ba la sdang pyntreikam ïa ka State Aquaculture Mission naduh u snem 2012, ha kaba la buhthong ba ka Meghalaya kan lah ban pynmih dohkha hi lyngba ka jingshna ïa ki pung dohkha ha kylleng ka Jylla.
Kine ki pung dohkha, kham bunsien la sakhi ba ki dei pynban ki jaka ïakop khwai dohkha, ha ka jaka ba ki trai pung kin pynleit jingmut ban pynmih dohkha kham bun.
U Bah Hek u la ong ba ka tnat ri dohkha mynta kan phai khmat ban buh ïa ki Fish Sanctuary kumba 8 tylli ha ki wah kiba don ha kylleng ka Jylla, bad ïa kine ki wah, yn pynlong ruh kum ki jaka kiba itynnad ban khring bha ïa ki nongjngohkai bad kane ruh kan kyntiew ïa ka ïoh ka kot ki paidbah jong kano kano ka jaka kaba don kine ki fish sanctuary.
Haba kylli, katno ka Meghalaya ka la lah ban pynmih dohkha hadien ba la pyntreikam ïa ka Aquaculture Mission naduh u snem 2012, u Bah Hek u la ong ba ka Jylla mynta ka dang shaniah hi kumba 80% ban wanrah dohkha nabar Jylla bad tang 20% la lah ban pynmih dohkha nalade.
Haba kylli, la ka Aquaculture Mission ka dei kaba khlem lah pyntreikam bha, u Bah Hek u la ong ba ym lah ban ong ba ka jingpyntreikam ïa ka Aquaculture Mission ka pulom ne khlem lah ban pynmih dohkha.
“Ym dei ba ka Aquaculture Mission ka khlem treikam bha,” u la ong.
Haba kylli la ka khwai dohkha ha kine ki pung kan long kum ka kam khalai, u Bah Hek u la kyntait ba ka khwai dohkha ka dei ka khalai.
Kumta u Bah Hek u la banjur ba donkam ban pynkylla ïa kine ki Fish Sanctuary kum ki jaka jngohkai kiba lah ban khring ïa ki nongjngohkai.
U la ong ba ka Wah Umlew ha thaiñ Umroi kaba hap ha Ri Bhoi district ka dei ka wah kaba biang ban buh ïa ka Fish Sanctuary da kaba pynitynnad shuh shuh ïa ka jaka bad kan long ka jingmyntoi ïa ki paidbah ka thaiñ ha ka ïohkam ïohjam bad ka ïoh ka kot.
