New York, ïaïong:
Ki bor pyniaid ka United States ki la ioh sei noh ia 2 tylli ki metiap jong 2 ngut ki nong India kiba la jah rngai ha ka wah Indiana jong ka United States.
Kitei 2 ngut ki kynthup ia u Siddhant Shah,19 snem ka rta bad u Aryan Vaidya, 20 snem ka rta. Kine 2 ngut ki la ialeit ban jngi ha ka wah Monroe Lake, kaba don kumba 64 mer na Southwest jong ka Indianapolis, ha ryngkat bad kiwei paralok jong ka kynhun ba ialeit lang bad ki sha katei ka wah ha ka 15 tarik u Iaiong, hynrei la ong ba kitei ki 2 ngut kim shym la mih shuh na katei ka wah hadien ka jingia jngi kai bad kitei ki paralok ha katei ka por.
La ong ba baroh 2 ngut ki dei ki khynnah pule jong ka Kelley School of Business ka IU bad ki la jah ha katei ka wah naduh katei hi ka 15 tarik.
Hynrei ia ka met jong ki la lap da ki kynhun ngam um bad ki tnad wad bniah ha ka 18 tarik jong une u Iaiong.
La iathuh ba u Shah bad u Vaidya ki dang shong da ka lieng ha katei ka por ba kitei ki paralok ki la khot ia ki ban ia jngi lang ha katei ka wah.
Hynrei la ong ba kitei ki 2 ngut kim shym wan mih pyrthei shuh hadien ba ki la ia jngi lang bad katei ka kynhun ha katei ka sngi, bad watla kitei kiwei pat ki paralok ha katei ka kynhun ki la pyrshang ban wad ia kitei ki 2 ngut, hynrei kim shym lap satia tad haduh ba ka miet ka la wan bad ki la pyntip noh sha ka tnat ba dei khmih halor ka jingjah rngai jong kitei ki 2 ngut kiba la ialeit lang badki ha katei ka kynhun.
La ong ba katba kitei kiwei ki dang ia pyrshang ban leit iarap, uwei napdeng kitei 2 ngut pat u la kyrthat iap lypa hapoh um namar ka jingbym ioh lyer ban ring mynsiem bad namar ba um nang ban jngi.
Watla ki kynhun ngam um ki la pyrshang ban ngam ia katei ka wah bad ban wad ia kitei ki 2 ngut ha baroh shi sngi jong ka 16 tarik ka sngi ba bud, hynrei kim shym lap ksai eiei.
La ong ba katei ka wah ruh ka dap da ki nongshong lieng ha katei ka 15 tarik namar ba ka long ka sngi kaba shit sngi bad ba syaid.
Hynrei hadien 2 sngi, ka jingjur jong ka lyer ka la rah ia ka um bad kiba bun ki bynta jong katei ka wah ki la paw shyiap bad kumta kane ka la pynsuk ia ki ba kin lap bad ioh sei ia ka met jong kitei ki 2 ngut kiba la ngam jyllop bad shah rah ha katei ka um haduh ba kin da poi sha katei kawei pat ka bynta jong ka wah.
Haba iadei bad kane, na ka liang jong katei ka jaka pule, ka la phah ia ka khubor sngewlem sha ka iing jong kitei ki 2 ngut kiba la duh noh ia ka jingim ha katei ka jingjia ba sniewbok.
