Shillong, Ïaïong 24:
Ka Shillong Lajong Football Club ka la duh noh ïa ka kyrdan ba nyngkong ha ka lympung ïalehkai Second Division League 2022-23, hadien ba shah rem ha ka United Sports Club da 2-1 kol ha ka Lah Sngi U Blei.
Ha kane ka jingïakhun jong ka wat ba ar kaba la long ha Kolkata, baroh arliang mamla ki la ïakhun tyngeh naduh kaba sdang ha kaba ki la ïoh ïa ki katto katne ki kabu kiba biang.
Wat la kine ki kynhun ki la ïakhaid mar 1-1 kol ha ka wat ba nyngkong kaba la long dangshen ha ka nongbah Shillong, hynrei ka United ka la ïoh ban thep kol nyngkong ha la ïing lyngba u Amit Chakraborty ha ka minit kaba 23 na ka bynta ban tam shi kol ha ka kylla step.
Hadien katto katne por ba la bteng ïa ka jingïakhun jong ka kylla miet, u Everbrightson Sana Mylliempdah u la ïoh ban pynphai kylla na ka bynta ka Lajong ha ka minit kaba 59.
Ka United ka la thep biang sa shi kol lyngba u Amit Tudu ha ka minit kaba 79. Wat la ka Lajong ka la pyrshang kat lah kat ïai ban ïoh pynphai, hynrei kam shym lah ban pynïakhaid bad ka la mad ïa ka jingshah rem kaba nyngkong eh ha kane ka lympung.
Ka United lyngba kane ka jingjop ba lai ka la jam sha ka kyrdan ba hakhlieh na ka Group-B bad kamai 11 dor-thong (point) na ki san sien ïakhun, katba ka Lajong (10 dor-thong) ka la hiar sha ka kyrdan ba-ar.
Ka Lajong kan pynkhreh ïa ka jingïalehkai kaba khatduh jong kane ka lympung pyrshah ïa ka East Bengal ha ka sngi Saitjaiñ (29 tarik). Wat la katei ka kynhun hapoh ka jingïalam u Bah Bobby L. Nongbet ka la jop teng ïa ka East Bengal shabar na la ïing, hynrei ka donkam ban pyntikna ban khur ïa ka jingjop ha kane ka jingïakhun ha la ïing khnang ban jam sha kawei pat ka wat jingïakhun.
