Jowai, Ïaïong 24:
Lada ka Karbi Anglong Autonomous Council (KAAC) ka kloi ban weng ïa ka khyrdop khrong khajna bad ki pulit jong ka hapoh ka Shnong Khanduli, ka Dorbar Shnong Khanduli ruh ka kloi ban weng ïa ka jingpyrkhing halor ka rung ka mih jong ki nongshong Shnong ka thaiñ Khanduli bad ki Karbi lyngba ka Khanduli.
Ïa kane la ong u Waheh shnong u Bah Yooshida Nongspung hadien ba la dep ban ïakren bad ka Deputy Commissioner jong ka West Karbi Anglong District ha Khanduli ha ka Lah Sngi U Blei.
“Lada ka KAAC ka weng ïa ka khyrdop khrong khajna bad ki pulit jong ka, ngi ruh ngi kloi ban weng bad ka rung ka mih, ka leit ka wan, ka leit rep leit riang, ka khaïi pateng hapdeng ki Khasi Pnar bad Karbi kan long kumba ju long khlem don kano-kano ka jingsngew,” la ong u Waheh Shnong.
