Khartoum, ïaïong:
Katkum ki khubor la ong ba ki liengsuiñ shipai ka United States ha kane ka por ki dang ialeh kat lah kat iai ban pynkloi ia ka jingleit shaw noh ia ki paidbah nongshong shnong ka US kiba don ha Sudan. Kane ka long hadien ba ba ka thma kaba khie hapoh katei ka ri ka la nang jur kat nang iaid ki sngi. Namarkata ruh la ong ba ym tang ka US, hynrei kiwei ki ri ruh ki la ialeh ban leit shaw noh ia la ki briew lajong kiba dang don ha katei ka ri namar jong katei ka thma.
Kumjuh ruh ka France bad ka Turkey ha ka Sngi U Blei ka la phah ia la ki shipai ban leit shaw ia ki briew lajong na katei ka ri hadien ba katei ka thma ka la neh mynta la kumba ar taiew.
La ong ba ka jing-iakhun hapdeng kitei ki ar kynhun shipai jong ka Sudan ka la nang jur katba nang mih ki sngi. Ha kane ka kynti, kitei ki arliang shipai ki la sei syndon da ki tup- ki man bad ki liengsuiñ thma bad ka jingiakhun ka la jia ruh ha ka thaiñ Khartoum kaba heh paid bad kaba bun ki paidbah nongshong shnong bad kumta ki la don ruh palat 400 ngut kiba la duh ei noh ia ka jingim hapdeng ka jingiakhun thma jong kitei ki ar kynhun bad da ki hajar ngut ruh kiba la ngat bad mynsaw ha katei ka jingjia.
U President ka United States, u Joe Biden haba ai jingkren ha ka Sngi U Blei, u la iathuh ba ka US ka la phah ia ki shipai suiñ jongka ban leit shaw noh ia kitei ki paidbah jong ka ri kiba dang sahkut hapoh jong katei ka ri bad ha kajuh ka por ruh u Biden u la pynrem jur halor katei ka jingiapher jingmut jong ki heh nongialam jong kitei ki ar kynhun shipai, kiba la wanrah ia katei ka thma ha kum kane ka por.
Kumta la ong ba palat 100 ngut ki shipai ba la phah kyrpang da ka US, ki la leit ban shaw noh da ki liengsuiñ ‘Helicopter’ kiba la ioh ban kit kumba 100 ngut ki briew na Khartoum.
Kumjuh ruh ka tnat kam bar ri jong ka France ha ka Sngi U Blei, ka la pynbna ba ka sorkar France ka la phah ia ki shipai suiñ jongka ban leit shaw ia kitei ki paidbah kiba sahkut ha katei ka ri bad kumjuh ruh kin iarap ban pynkit lem ia kiwei de ki paidbah na ki ri ba marjan kum shi bynta ban pyllait im ia ki na ka jingma kaba ap ia ki haba iadei bad katei ka thma Sudan.
Katba, ka Turkey pat la ong ba ka la sdang ban leit shaw ia ki paidbah jongka da ki trok bad ki kali lyngba ki surok jong ka nongbah Wad Medai, hynrei la shah pynsangeh noh ia katei ka jingleit shaw jongka namar ka jingbthei kaba la jia hapoh Khartoum hajan ka jakamane Muslim kaba don ruh hajan ka iing dorbar thaw aiñ.
La ong ba ka jingiakhun hapdeng kitei ki kynhun shipai hapoh ka jingbthah jong u heh shipai Abdel Fattah al-Burhan bad u Symbud jong u- u Mohamed Hamdan Daglo, ka la sdang ha ka 15 tarik u Iaiong bad ka la nang jur bad nang heh tad haduh kane ka kynti ba mynta.
