Munich, ïaïong:
Ka khlur ialehkai tennis ka ri Poland kaba dang iai bat kum ka lahduh ha ka pyrthei ka Iga Swiatek sa shisien ka la rah biang ia ka jingjop na ka Stuttgart Open. Kane ka wan urlong hadien ba khur ia ki jingjop ha baroh shi lynter ki set iakhun na ka bynta ban iai bat ha lade ia katei ka nam lahduh.
Kumta ha kaba iadei bad katei ka jinglah jong katei ka nongialehkai ban khur ia ka nam lahduh ka long hadien ba ka Iga ka lah pynliem noh ia ka nongiakhun kaba bat ia ka kyrdan ba-ar ha ka pyrthei ka Aryna Sabalenka na Belarus da 6-3 6-4 kaba long ruh ka jingban biang sa shisien jong u snem ba lah dep jong ka jingiakhun phainal ka jong ka da kaba rah ia ka nam lahduh.
Katkum ka khubor ka iathuhruh ba ka Iga ka baroh shi katta ka don hapdeng ki jingmynsaw ha ki khyndiat taiew ba lah dep, hynrei kaba lah ioh pat ban wanphai sha ka jingkoit jingkhiah bad ka jinglah ban pynwandur ia ka rukom ialehkai na ka bynta ka jingiai kyntiew shuh shuh ka jong ka ha ka jingpynkhreh ia ka French Open ka ban sa long ha u bnai ban wan ha kaba katei ka nongialehkai kan hap ban iada biang sa shisien ia ka nam jong ka ha ka lympung.
Ha kane ka kynti ba mynta ka long ruh ka nongialehkai kaba nyngkong napdeng kiwei pat ban khur biang sa shisien ia ka trophy jingjop na katei ka lympung ialehkai naduh ka por jong ka Angelique Kerber ha u 2015 bad 2016 ha ryngkat bad ka tei ka nongiakhun pyrshah jong ka; ka Aryna Sabalenka ka mad biang mynta ia ka sien rem kaba lai ha ka jingiakhun phainal ba ka lah ioh ban shimbynta. Haba phai sha ka jingiakhun ha Germany, u Holger Rune u la lah ban pynseisoh ia ka jingwanphai sha ka kam ialehkai da kaba khur shalade ia ka jingjop ha ki set iakhun na ka bynta ban pynliem noh ia u nongiakhun pyrshah na Netherlands u Botic van de Zandschulp da 6-4 1-6 7-6 (7-3).
Ka long ruh ka trophy ATP kaba saw ha kaba u Rune u la lah ban khur shalade mynta bad ka jingiai ban biang sa shisien ka jong u ia ka jingiakhun phainal ha 2022; ia kaba lah shem ba u Van de Zandschulp u lah shongthait noh na ka jingmynsaw tang hadien ki hynniew jingialehkai jong ka set iakhun ba nyngkong.
