London, ïaïong:
Kawei na ki nongmareh Middle-Distance na ka ri Netherlands ka Sifan Hassan ka la lah ban pynurlong halade na ka bynta ban rah ia ka thong jingjop bad ka jingpynpawnam ialade ha ka lympung ialehkai Marathon; ka lympung ialehkai kaba ka shem halade ba ka long kum ka jingtynjuh ka ban plie ha ka ia ka lad ka lynti sha ka jing-iakhun jong ka nalor ka jing-ialehkai Marathon ha ka jingmareh kaba kham jngai bad pajih ha ka Paris Olympic 2024.
Katei ka nong-mareh kaba la rah ruh ia ka jingjop ha ka Olympic ha ryngkat bad ka takma Ksiar ha ka 5,000 bad 10,000m, ka lah pynpaw halade ia ka jingwanphai sha ka kam ialehkai hadien ka jingmynsaw kaba dangshen ba ka lah ioh na ka bynta ban lah ha ka ban tam noh shakhmat ia ka lahduh Olympic ka Peres Jepchirchir bad ia ka nongialehkai kaba dang iai bat kum ka lahduh ka London ka Yelamzerf Yehualaw.
Ha kata ka jingiakhun, ka Hassan ka lah pyndep ia ka jingiakhun ka jong ka ha ka por 2:18:34 ha ryngkat bad ka jingmareh sted da ka mynsiem ba shitrhem ha ka jingiakhun phainal ha ka 100m da kaba tam shakhmat da 3 sekhon ia kaba wan ba-ar ka Alemu Megertu na Ethiopia bad ka nongialehkai na Kenya ka Jepchirchir ka lah wan ha ka kyrdan balai.
Katei ka nongmareh ka iathuh ruh ba ka don ia ka jingthmu na ka bynta ban shimbynta ha ka Marathon la kan long ha Chicago ne ha New York mynta u snem hadien ba pynleit jingmut bha ha ki kam ialehkai ha ka Track na ka bynta ka World Athletics Championships ha Budapest ka ban sa long ha u bnai Nailar mynta u snem.
Shuh shuh na ka jingiakhun ki shynrang, u nongmareh na Kenya u Kelvin Kiptum u la lah ban thaw ia ka rekod ha ka London Marathon da kaba pyndep ia ki jing-mareh ha ki 2 kynta; 1 minit; 25 sekhon, la jan lai minit na ka bynta ban tam shakhmat ia uba wan ba-ar u Geoffrey Kamworor.
Utei u nongmareh uba lah mareh sted bha ha ka jingpynpaw ialade shakhmat ha ka jing-ialehkai Marathon ha Valencia ha u snem ba lah dep, u la shim ia ka por shongthait ka jong u ha ka 19 mer jong ka jingmareh da ka jinglah ban wanrah ia ka jingtam kput shakhmat ia kiwei pat ki paranongmareh ban long kum u nongmareh sted ba-ar ha ka jingialehkai Marathon.
Hadien ba u lah pyndep ia ka jingiakhun da kaba tam ia u lain ba lah buh, utei u nong-ialehkai u lah kyllon ha madan.
