Shillong, Ïaïong 24:
Ki lai tylli ki Autonomous District Council (ADC) ka Jylla ki la shim ïa ka rai ban mynjur lang da ka ‘resolution’ ban pyrshah ïa ka jingthmu ka Sorkar Pdeng ban pyntreikam ïa ka Uniform Civil Code (UCC) hapoh ka Jylla.
Ïa kane ka rai la shim ha ka jingïalang jong ki Chief Executive Member (CEM) ka Khasi Hills Autonomous District Council (KHADC), ka Jaiñtia Hills Autonomous District Council (JHADC) bad ka Garo Hills Autonomous District Council (GHADC) kaba long ha ka Lah Sngi U Blei ha kamra jingïalang ka KHADC ha nongbah Shillong.
Haba kren sha ki lad pathai khubor hadien ba la wai ka jingïalang, u CEM ka KHADC u Bah Titosstarwell Chyne u la ong, “Ngi la shim rai da kawei ka jingmut ba ngin mynjur lang da ka resolution ba ngin pyrshah ïa ka jingpyntreikam ïa ka UCC ha ki jaka ka Sixth Schedule bad ngin sa mynjur ïa kane ka Resolution ha la ki jong ki Council.”
U Bah Titos u la ong ba ha kane ka jingïalang la ïoh ban ïatai bad ïasyllok sani halor ka jingthmu jong ka Sorkar Kmie ban wanrah ïa ka UCC Bill hapoh ka Ri namar ba ka UCC kan ktah beit ïa ka bor bad ka jingtreikam jong ki ADC khamtam halor ka riti dustur, ki tynrai, ki shnong ki thaw kumjuh.
Haba kylli hato kine lai tylli ki ADC kin khot ne kumno ïa ki Dorbar Kyrpang ban ïatai bad shim rai halor kane ka kam, u Bah Titos u la ong ba la kyrmen skhem ban sa khot noh ïa ka Dorbar Kyrpang ha u bnai ban wan namar ki kwah ban pynsted wut-wut ïa ka kam.
“Ki don shibun ki jingeh kumba nga la ong ba ka UCC kan sa ktah ïa ka riti dustur kum ka kam ïa kyntiew kurim. Shisien ba la pyntreikam ïa ka UCC, ngin sa don ïa ka Uniform Marriage System (rukom ïa kyntiew kurim ba kumjuh) hynrei ha ka dustur jong ngi, ngi ïapher bha. Kumta ka jingïakyntiew kurim ha ka niam bad ka riti dustur kan sa shah ktah. Kum ki Scheduled Tribe, ngi sngew ba ka jingpyntreikam ïa ka UCC ka dei ka bym lah ban pdiang hapoh ka Jylla,” la ong u CEM ka KHADC.
Nalor kane, u Bah Titos u la ong, ka Sorkar Jylla ruh kan hap ban ïaid ha kajuh ka lynti ba ki lai tylli ki ADC ki la mynjur ïa ka resolution kumba long ha ka kam jong ka Citizenship Amendment Act.
“Ka CAA ka dei kaba la pyllait na ki Scheduled Areas, nga sngew ba ka UCC ruh kam dei ban treikam na ki jaka Sixth Schedule. Namar kata, ngi dawa ban pyllait noh ïa ka UCC na ki jaka ba hap hapoh ka Sixth Schedule,” u la ong.
