Spain, ïaïong:
Ka jingiakhun phainal jong u khlur ialehkai tennis ka ri Spain u Carlos Alcaraz ha ka Barcelona Open mynta u snem ka la long kaba seisoh bad ba jop naba utei u rangialehkai u la lah ban pynliem noh ia u rangiakhun pyrshah na Greece u Stefanos Tsitsipas ha baroh shi lynter jong ki ‘set’ iakhun na ka bynta ban rah ia ka trophy jingjop ba ar jong ka lympung.
Kumta ha kaba iadei bad katei ka jingjop ka jong u, utei u rangialehkai ba 19 snem uba bat ia ka kyrdan ba 2 ha ka pyrthei, u la lah ha ka ban khur noh shalade ia ki 6-3, 6-4 jingjop na ka bynta ban khur ia ka trophy balai jong une u snem ba mynta; hadien ba u lah dep ban rah ia ka thong jingjop ha Buenos Aires bad Indian Wells ruh kumjuh bad ka long ruh ka jingjop kaba khyndai ha ka jingim ialehkai ka jong u. Ha kata ka jingiakhun phainal ka jong u, ka jingbakla kaba u Carlos u lah wanrah ha ka jingiakhun ka long ka jingpynlehnohei ia ka jingsambol ka jong u na ka bynta ban khur dor-thong ha ka jingialehkai kaba lai bad naduh kata ka jingbakla, utei u rangialehkai u lah iai pynkhlain ia ka rukom ialehkai ka jong u shaduh ka 79min ia aireng na ka bynta ban rah ia ka thong jingjop pyrshah ia u Stefanos ha ki saw sien iakhun kaba ki ar ngut ki iakynduh. Shuh shuh ka khubor ka iathuh ruh ba u Tsitsipas mynta u lah duh noh ha ka ban khur ia ka jingjop ha ka sien kaba lai jong ka jingiakhun phainal ka jong u ha Barcelona; hadien ka jingshah pynliem ha u Nadal ha u snem 2018 bad 2021. Haba phai shuh shuh sha ka jingiakhun ha katei ka lympung ba mynta, u Tsitsipas u lah iohlad ha ka ban pynkhein dor-thong ia u Carlos na ka bynta ban tam jingjop shakhmat da 2-1, hynrei u Alcaraz u lah khur ia ki san jingjop jong ki hynriew jingialehkai ba hadien na ka bynta ban pyniaid ia ka jingiakhun baroh kawei.
Hadien katei ka jingjop, u Carlos Alcaraz mynta u lah leit sha ka nongbah Madrid na ka bynta ban shimbynta sa ha ka lympung Madrid Masters; kaba long ka lympung ialehkai ha kaba u dang iai bat haduh mynta kum u lahduh jong ka. Haba phai sha ka jingiakhun ba mar arngut ki shynrang ha ka lympung, u Neal Skupski na Bilat & u Wesley Koolhof ki lah shah pynliem noh ha ki rangiakhun pyrshah na Argentina; u Maximo Gonzalez & Andres Molteni; ha kaba u Gonzalez & Molteni ki lah rah ia ka jingjop da 4-6 7-6 (10-8) 10-4 na ka bynta ban khur ia ka jingjop kaba lai jong u snem hadien ka jingjop jong ki ha Cordoba & Rio de Janeiro.
