Jowai, Ïaïong 24:
Shi taïew hadien ka jingwan pynïeng ïa ka khyrdop lum khajna bai rung da ka Karbi Anglong Autonomous Council (KAAC) ha Khanduli, West Jaiñtia Hills District, ki nongïalam na ki seng bapher bapher ki la ïoh lad ban pynpaw ïa la ka jingpyrshah halor katei ka khyrdop ha ka Deputy Commissioner jong ka West Karbi Anglong District ka Krishna Baruah ha shnong Khanduli ha ka Lah Sngi U Blei jong ka taïew.
Ki nongïalam seng kiba kynthup ïa u General Secretary jong ka Jaiñtia Students’ Union u Samla Treiborlang Suchen bad kiwei kiwei ki la pynpaw ha ka DC ba katei ka jaka ba wan buh khyrdop ka KAAC ka dang hap pura hapoh u pud u sam jong ka shnong Khanduli katba ym pat dep pynbeit pud da ki sorkar ka Assam bad Meghalaya.
Nangta u la dawa ruh ïa ka DC ban weng noh ïa ki pulit Assam ba la buh ban ap pahara ha shnong Khanduli la shi taïew tam ha kane ka jaka.
U la bynrap ba lada la weng ïa ka khyrdop lum khajna bai rung jong ka KAAC, ka jingsuk ka la wanphai hi dalade sha katei ka thaiñ.
Na ka liang ka Deputy Commissioner jong ka West Karbi Anglong ka la kular ban ïakren bad pynsngew sha ka KAAC halor ka jingpyrshah jong ki seng bad ka Dorbar Shnong Khanduli halor ka jingwan buh khyrdop ha ka shnong Khanduli bad ka jingdawa jong ki, ba dei ban weng noh ïa katei khyrdop mardor.
Ka Deputy Commissioner ka la pynshai ruh ba ka jingbuh ïa ki pulit Assam ha katei ka jaka ka long kaba tang shipor na ka bynta ban pynneh ïa ka shongsuk shongsaiñ ha ka thaiñ.
Nangta ka la bynrap ba yn sa weng noh ïa ki pulit Assam ynda ka shongsuk shongsaiñ ka la wan phai.
Ha kane ka sngi la ïadon lang ryngkat u SP ka West Karbi Anglong nalor kiwei ki heh pulit ha ka por ba ki seng ki la ïakynduh ïa ka Deputy Commissioner.
Ha shwa ba ki seng bad ki nongïalam shnong ka Khanduli kin poi sha katei ka jaka ba la buh ïa ka khyrdop ka KAAC, ka la don ka jingïapyni bor hapdeng ki majistor bad heh pulit bad ki nongïalam seng hajan ka BOP Meghalaya.
Kumta ki seng ki la kwah ban leit tur bun ngut sha katei ka jaka, hynrei ki majistor bad ki heh pulit bad ki pulit kumjuh ki CRPF ki la lah ban tehlakam ïa ki seng bad la shah tang arphew ngut ban leit sha katei ka jaka ba la buh khyrdop.
Ha shwa katei ka jingleit tur sha katei ka jaka ba la buh khyrdop da ka KAAC, ka la don ka jingïalang paidbah ha madan phutbol Khanduli. Ha kane ka jingïalang la ïoh ka jingkren na u samla Treiborlang Suchen, u President ka HANM u Bah L Kharbani, President KSU West Jaiñtia Hills u Laitphar Syngkrem nalor kiwei kiba la pynrem ïa ka KAAC kaba la wan buh ïa ka khyrdop ha Khanduli bad ki la dawa ïa ka KAAC ban weng noh mardor ïa ka.
Kum ban shu pynkynmaw ha ka 15 tarik mynta u bnai, ka Karbi Anglong Autonomous Council (KAAC) ka la sieh jubor ïa ka signboard hapoh u pud u sam jong ka Dorbar Shnong Khanduli na bynta ban khrong khajna ïa ki kali kit mar rep jong ki nongshong shnong ka Khanduli.
Ki nongshnong shnong kiba la bitar ïa kane ka jingleh bor jong ka KAAC ki la leit pynpra ïa katei ka signboard ha ka 17 tarik bad ka la mih ruh ka jingïapyni bor bad ka thma ktien kaba jur hapdeng ki nongshong shnong ka Assam bad ki nongshong shnong ka Meghalaya.
Tang hapoh khyndiat kynta hadien ka jingshah pynpra ne jynrat jong ka signboard, ki bor pynïaid jong ka Karbi Anglong Autonomous Council (KAAC) ki la wan sieh biang da kawei ka Signboard ha katei kajuh ka jaka.
