Geneva, ïaïong
Na ka liang jong ka synjuk pyniaid jingialehkai phutbol ha kylleng ka pyrthei ka Federation International of Football Association (FIFA), ka iathuh ba mynta ka la ioh pdiang ia saw tylli ki jingtywa iathong jong ki ri kiba iaknieh mynta ban ioh pynlong ia ka lympung ialehkai World Cup ki kynthei ha u snem 2027.
Kumta ha kaba iadei bad katei ka bynta, ka FIFA ka iathuh ba ki ri ki ban shah pynkhmati ban ioh pynlong ia ka lympung ialehkai yn sa jied paidbah ha ka jingialang Congress jong ka synjuk ka ban long pat ha ka 17 tarik u Jymmang, 2024.
Kumba ka paw mynta ka long ba ka ri Germany, Belgium bad Netherlands ki lah dep ban phah ia ki jingtyrwa kum kawei ka kynhun iasnoh kti lang kawei na ka bynta ban pynlong ia ka lympung. Katba kiwei pat ki jingtyrwa iasnoh kti lang na ka bynta ban ioh pynlong lang ia katei ka lympung ialehkai ki kynthup ia ki jingtyrwa kiba la wan na ka ri United States bad Mexico.
Kumjuh ruh ka ri Brazil bad South Africa ki long kiwei pat ki ar tylli ki ri ki ban sa phah ia ki jingtyrwa iathong ka jong ki sha ka FIFA.
Na ka liang jong ka FIFA ka iathuh ruh ba kan sap hah ruh ia kata ka jingmynjur jong ka jing-iathong (Bidding Agreement) sha baroh ki ri kiba pynpaw ia ka jingkwah jong ki ban ioh pynlong ia ka lympung bad ki ban sa ioh por haduh ka 19 tarik u Jymmang kum ka jingpynthikna ia ka jingdonbyntalang jong baroh kita ki ri.
U Secy. Genl ka FIFA u Fatma Samoura u pynpaw ia ka jingsngew kyndit kaba khraw halor ka jingioh pdiang ka kynhun treikam jong u ia ka EoI (Expressions of Interest), ym tang ba kata ka wan na ki dkhot jong ka Association kiba khlain ha ka kam ialehkai phutbol ka jong ki ha ka jingmihkhmat ia ki saw tylli ki Federation.
Hynrei baroh ki dkhot jong ka Association ki lah ban shaniah tylli ha ka rukom tyrwa kaba ishongkun bad ba ibiang ha ka jingpyntyllun ia ka kam na ka bynta katei ka lympung ialehkai World Cup jong ki kynthei.
Shuh shuh ruh ka ri Australia bad New Zealand ki long kita ki ri kiba la ioh ha ka ban pynlonglang (co-hosts) ia ka bynta jong katei ka lympung ialehkai mynta u snem ka ban sdang naduh ka 20 tarik Naitung.
Kumta ruh ka U.S., Mexico bad Canada kin long kita ki ri ki ban ioh pynlong lang (co-host) na ka bynta ka lympung ialehkai jong ki shynrang ha u 2026.
