Shillong, Ïaïong 25:
U kyrtong ka NPP na Sohïong konstitwensi, u Bah Samlin Malngiang u la kynnoh ba dei ka seng United Democratic Party (UDP) kaba la donkti ban weng ïa u Lyngdoh Sohïong ban pynmih shibun ki huri-hura ha ki shnong ki thaw tang ban myntoi ha kane ka ilekshon.
Haba ai jingkren ha ka jingïalang ka NPP kaba long ha phyllaw ïing jong u Bah Samlin Malngiang ha Umsaw ha ka 24 tarik Ïaïong 2023, u Bah Samlin u la ong ba ki shnong ki thaw ki la shongsuk ha Sohïong, hynrei u CEM ka KHADC, u Bah Titos Chyne ryngkat u kyrtong barim ha kine ki bnai ba la dep ki la weng jubor ïa u Lyngdoh khlem da pyntip ïa u MDC ka thaiñ u Bah Sherborlang Mawlong. Kane ka pyni ïa ka jingleh donbor ka seng UDP.
U la ong ba kane ka jingweng ïa u Lyngdoh ha jaka ba u CEM ka KHADC un thung Acting da ka Kur Thabah, hynrei kim treh namar ki kwah ban synshar hi ban ïoh pynjop ilekshon ïa ka seng UDP.
“Nga kyntu ïa ki paidbah ba kim dei ban rit mynsiem namar lada nga jop yn wanrah biang ïa ka shongsuk shongaiñ bad ka roi ka par hapoh ka konstitwensi” u la ong.’
Nangta ruh u la ong ba wat jied ïa kiwei ki kyrtong namar ki hap ban sdien ha ka bos NPP kaba la dap lypa bad kaba ïalam mynta ïa ka sorkar, hynrei dei ban jied beit ïa u kyrtong ka NPP uba la long trai lypa ha ka sorkar.
Ha kajuh ka por u Bah Samlin u la pynshai halor ka jingmih ki khubor ha Social Media halor ka jingpynthohbria ïa ka jingkren jong u, u la ong ba ka jingkren ka jong u ka long ba ki paidbah ki dei ban bud nuksa ïa ka jinghikai ki Rangbah Balang naduh ki Pastor, ki Phadar bad ki Tymmen Basan ba ki dei ban duwai shwa ban thiah, hadien ba la khie bad duwai shwa ban bam bad ban trei. Hynrei, kine ki briew ki kwah ban pynthohbria ki kynnoh ba u Bah Samlin u ong ba ki Pastor ki klet ban duwai haba ïoh jyntah bang.
Kumta u la kyrpad ïa ki nongkyrshan bad ïa ki Rangbah Balang ba um shym la ong kumta, hynrei kiba kwah ban pynthohbria ki ‘edit’ noh ïa ka video namar ki la shu ring na jngai tang ban pynthohbria ha kane ka ilekshok.
Nalor kata, u Bah Samlin u la pynkynmaw ba ha ka ilekshon shiteng samoi ka MDC ha u snem 2016, ki la kynnoh ïa u ba u dei tang u nongtheh ja sniang, hynrei ynda la ñiew ïa ki vote u jop u nongtheh ja sniang.
U la pynkynmaw biang ba ha u snem 2018 haba ka wan ka ilekshon MLA ki la pynsaphriang ïa ka dur ba u spong ba ka dei ka spong nongïap, hynrei ynda la ñiew vote u jop.
Nangta shuh shuh u la pynkynmaw biang ba ha u snem 2019 kaba dei ka ilekshon MDC haba ïakhun u Bah Sherborlang Mawlong ki kynnoh ba u Bah Samlin u la kylla Hindu namar u la leit mane blei thaw haba u leit sngewlem halor ka jingkhlad u Atal Bihari Vajpayee, hynrei ynda la ñiew hangne ruh la ïoh jingjop. Namar kata, mynta ka kynti u Bah Samlin u kyrmen ban jop biang namar ki la shna khubor lamler tang ban pynjah burom.
