Shillong, Ïaïong 25:
U Symbud Myntri Rangbah ka Jylla u Bah Prestone Tynsong uba dei ruh u National Vice President ka National People’s Party (NPP), u la pyni dak ba ka lah ban don ka jingkylla ha ka saiñ pyrthei, kaba lah ban wan jia hapdeng ka 6 haduh 8 tarik jong u Jymmang, 2023.
Haba kyntait pat ban ïathuh eiei halor ka jinglah ban kylla ka saiñ pyrthei, u Bah Prestone u la ong ba halor kine kiei kiei baroh halor ki kam saiñ pyrthei un sa pyntip beit hapdeng ka 6 haduh 8 tarik ha u Jymmang ban wan.
Katkum ka khubor ba la ïoh la ïathuh ba kane ka jingkylla ha ka saiñ pyrthei kumba la kdew da u Bah Prestone ka lah ban dei ka jingpynïasoh pura noh jong ar ngut ki MLA ka People’s Democratic Front (PDF) sha ka National People’s Party (NPP) kaba lamkhmat ïa ka Sorkar MDA-2.
Lah ruh ban pynkynmaw ba ha kawei na ki jingïalang ïalap ilekshon kaba la long dang shen na ka bynta ka ilekshon MLA ha Sohïong Konstitwensi, u Bah Prestone u la pynbna paidbah ba kan sa don ka jingkylla ha ka saiñ pyrthei ha shwa jong ka 7 ne 8 tarik u Jymmang, kaba lah ban kyntiew ïa ka jingbun paid jong ka NPP.
Hynrei haba kylli, na ka liang u Bah Prestone u la kyntait ban ïathuh eiei, bad haba kylli halor ki MLA ka PDF ruh, na ka liang une u nongïalam ka NPP u la ong beit ba um lah ban jubab ïa kata, hynrei ïa ka jingkylla yn sa ïohi beit ha kitei ki tarik.
Haba kylli pat halor ka jingïaid lynti jong ka NPP ha kane ka ilekshon ka ban long ha Sohïong, u Bah Prestone u la ong, ba ka don ha ka lynti kaba biang bad katkum ka jingpaw, ka lah ban dei ka jingïakhun hapdeng ka UDP bad NPP, bad wat bad ka Congress ruh kumjuh. Hynrei na ka liang ka seng kan trei shitom tat haduh ka 10 tarik u Jymmang na ka bynta ban ïoh rah ïa ka jingjop.
