Islamabad, Iaïong:
Ha katei ka jingjia la ong ba 10 ngut ki briew, kynthup ia 8 ngut ki pulit, ki la duh noh la ka jingim bad kumba 20 ngut pat ki la mynsaw ha ka jingbthei kaba la suba pynbthei da ki riewkheiñ duh hapoh ka tnat Counter Terrorism Deparment (CTD) jong ka tnat pulit Swat ka Pakistan ha ka Sngi Nyngkong.
La ong ba ki la don 2 tylli ki jingbthei hapoh jong katei ka station, bad kaba la pynjulor ia katei ka ïingmala jong ka tnat pulit ha katei ka por.
U IGP ka Khyber Pakhtunkhwa, u Akhtar Hayat Khan u la iathuh ba ki bor pyniaid ki la phah ia ki bor pahara ban leit pahara bad ker kut ia katei ka jaka hadien jogn katei ka jingbthei bad ban thwet ruh ia kino kino kiba don kti ha katei ka kam thombor.
Kumjuh ruh u Myntri ka tnat kam poh iing jong ka Pakistan, u Rana Sanaullah u la pynrem jur halor katei ka kam thombor jong ki kynhun kieng atiar ki bym shym la pynpaw bad kam halor katei ka jingjia kaba la shim ia ka jingim jong ki katto katne ngut. Kumta ruh u la ong ba kane ka kam thombor jong ki lehnoh kan sa duhjait noh shen da ka jingtrei shitom jong ka sorkar ba mynta.
Katei ka jingjia ha kane ka kynti, ka long ruh ha kum kane ka por ba ka Pakistan ka la ioh mad ia shibun ki jingjia thombor ha kaba ki kynhun lehnoh ki ju thmu ban thombor pyrshah ia ki nongthaw aiñ bad kumjuh ruh ia ki bor pahara kiba don ha kylleng ki bynta jong ka ri khamtam ha ki bynta khappud jong ka ri.
