Shillong, Ïaïong 25:
U Symbud Myntri Rangbah ka Jylla u Bah Prestone Tynsong u la ong ba ka jingpynkynriah ïa ki harijan ba sah ha Them Ïew Mawlong kan hap ban long beit.
Haba kren bad ki nongthoh khubor ha ka Sngi Ba-ar, u Bah Prestone u la ong, “Ka jingpynkynriah kan hap ban jia beit lada phi kylli ïa nga la ka Sorkar kan pynïaid shakhmat ïa ka jingtyrwa, naba ka jingtyrwa ka long kaba shai bha bad kumba nga ong naduh ka sngi ba nyngkong yn ïaid beit shakhmat.”
Kane ka jingkynthoh jong u Symbud Myntri Rangbah ka jylla ka la long hadien ka jingjubab jong ka Harijan Panchayat Committee (HPC) ba ka la kyntait ïa ka jingtyrwa jong ka Sorkar ban pynkynriah ïa ki 342 tylli ki longïing na Them Metor sha ka jaka jong ka Shillong Municipal Board (SMB).
Nangta u Bah Prestone u la ong, ka High Power Committee (HPC) jong ka Sorkar ka la dep ban kren da kaba shai ha ka jubab ba la ai ha ka 20 tarik mynta u bnai ba “Kim shym la pdiang ïa ka saiñdur ba la ai da ka Sorkar sha ki. Kane ka dei ka kam ba mynta”.
Nalor kata, u Symbud Myntri Rangbah u la pyntip ba u Advocate General ka Jylla u la pule ïa baroh ki kot ki sla bad shen ka Sorkar kan sa shong ban ïakren ïa kane ka kam.
Ha ka Lah Sngi U Blei, ka ïingbishar Meghalaya High Court ka la pynkynriah ïa ka jingshong bishar ïa ka mukotduma halor kane ka kam sha ka 7 tarik u Jylliew.
Ka ïingbishar ka la pynmih ïa kane ka hukum halor ka jingkyrpad jong ka Sorkar Jylla bad ka Harijan Panchayat Committee (HPC) ha ka jingshong bishar ha ka Lah Sngi Blei.
