Shillong, Ïaïong 25:
U kyrtong ka Hill State People’s Democratic Party (HSPDP) na Sohïong, Bah Sandondor Ryntathiang u la ong ba ki paidbah kim dei ban ngop ha ki nia ki ban pynïashrut ïa ki nongshong shnong hapoh konstitwensi.
“Kiwei-kiwei ki kyrtong kiba la ïaid ha kine ki sngi ki por kiba ngi la ïohi lyngba ki rynsan lad pathai, ki ktien ki thylliej kiba ki la ïakren, i kumba kam i dei shuh ka jingïalap ilekshon kaba kin ai ka jingshakri ïa u paidbah,” la ong u Bah Ryntathiang haba kren sha ki lad pathai khubor ha ka Sngi Ba-ar.
U la ong ruh ba ki nia ki jutang ha ki rynsan ïalap ilekshon ki long kiba poh dor bad i kumba dei ka politik ban pynhun ïano-re-ïano, da kaba pynksan bad pynrem ïano-re-ïano.
“Ngi ïohi ha kine ki sngi, ka jingïabeiñ-ïakhoh, uwei u kyrtong ïa uwei pat. Na ka liang jong nga, nga kyntu-kynpham ïa ki nong Sohïong baieid ba kin ym ngop ha kita ki nia ki ban pynïadait-pynïashrut bad ki ban pynïapait-ïapra ïa ngi ki nong Sohïong,” u la ong.
Halor ka ilekshon ban wan, u la ong ba kum u kyrtong u la ïoh mynsiem shi kat dei bad kumba ka long, ka jingpynsngew na u paidbah ka long kaba biang bha.
“Ka jingkyrpad sha ki nongshong shnong khamtam ki nongkyrshan ba ieid jong nga, ka long ba kin skhem, ban ïai neh ha ka nongrim bad ban ïatrei na bynta ka 10 tarik. Ngi khmih lynti ïa kaba bha ha ka 13 tarik,” la ong u Bah Ryntathiang.
Haba kyrpad ïa ki paidbah ban jied ïa u nongmihkhmat da ka jingshemphang bad ka jingstad, u la buh jingkylli ba hato kata ka ‘vote’ sngewsynei ka lah mo ban pynjop ïa u kyrtong ha kane ka ilekshon ban wan.
Halor ka jingtreikam jong ka bor pisa, u Bah Ryntathiang u la ai nuksa ïa ka Mawlai konstitwensi da kaba ong ba wat la ka jingtreikam ka pisa ka long kaba shyrkhei, hynrei ha ka sngi ñiew ‘vote’ “ki paidbah ki ai da u soh uba kumno…ngi tip lut”.
“Ki nong Sohïong jong ngi, lada ka treikam kata ka jingai jong u briew…tangba ïa ka ‘vote’ te kin ym ai. Don ka jingkren kaba ong…ïa ka pisa te ïa pdiang, ïa ka ‘vote’ te ha u Sing,” la ong u kyrtong ka HSPDP.
Haba pynsngew ba ka jingïakhun ka seng ha Sohïong ka long ban jop ïa ka ilekshon, u la ong ba ki mat kiba hakhmat eh hapoh konstitwensi ki kynthup ïa ki skul, ki surok ba bha, ka jingkyntiew ïa ka ïoh ka kot, ban khmih ba ki nongrep kin ym shah khñiot dor nalor kiwei-kiwei.
“Ki nong Sohïong mynta ki phai sha u samla u ban long uta u nongïasaid, u nongïakren ïa ki mat ki jura hapoh ïingdorbar thawaiñ. Kum ki nongshong shnong ka Sohïong, jied ïa u nongmihkhmat uba stad ba shemphang, bad uba lah ban kren ïa ki mat ki jura ym ban pynpait-pynpra ïa ka jinglong kawei ha ka konstitwensi bad ka jaidbynriew,” u la ong.
Shuh shuh u la bynrap, “Ka NPP ha Sohïong konstitwensi ka dang thymmai…kin ym ïoh briew bad kin ïoh tang na ka HSPDP. Ka HSPDP ruh ka pynïeng kyrtong…kumba ka long haduh mynta, hapoh Sohïong konstitwensi, ïa ka NPP kim pat pdiang.”
