Shillong, Ïaïong 25:
Ka Sorkar Jylla lyngba ka tnat Pule Puthi ka dang pynap ïa mynta ban leh ei ei ïa ki skul kiba don khynnah tang hapoh 10 ngut, wat la ha ka por jong ka Sorkar kaba la leit, ka la don ka jingmaham ban khang noh ïa kum kita ki skul kiba don tang khyndiat ngut ki khynnah.
Ha kajuh ka por, u Myntri ka tnat Pule Puthi, u la ïathuh ba u ïohsngew man ka por ba ki don ki nonghikai ki bym ju leit hikai sha skul, bad ki don kiba leit sha skul da kaba pud sngi.
Haba kylli aïu ka Sorkar kan leh ïa kum kine ki skul kiba la dep don lypa ha ka jingtip jong ka tnat pule puthi, u Myntri ka tnat pule puthi, u Rakkam A Sangma u la ong ba ka long kaba shisha ba ki don bun tylli kum kita ki skul kiba don khynnah tang hapoh 10 ngut (single digit enrolment).
“Ngi lah ban nym khang ïa kum kine ki skul, hynrei lah ban shu pynkynriah ïa ki nonghikai bad khynnah shawei pat ban nym don ka jingshah ktah. Ka Sorkar kan leh biang sa shisien ïa ka jingpynshisha ïa kita ki skul lyngba ka jinglum jingtip da ka kynhun shimet khnang ban ïoh ka jingtip kaba tikna halor ka jingdon ki khynnah khnang ban nym don kano kano ka jingleh thok,” la ong u Rakkam.
U la ong ba kane ka jinglum jingtip biang kam dei ban wad daw, hynrei ka dei ka lynti kumno ban pynbha.
U Rakkam u la ong ruh ba ki don ki skul kiba ym donkam shuh ban pynshisha biang.
Une u Myntri u la ïathuh ba kan sa don ka jingïalang bad ki Sub Divisional School Education Officer (SDSEO) bad ki Deputy Commissioner halor kane.
U Rakkam u la kubur ruh ba u ïohsngew ba ki don ki nonghikai ki bym ju leit sha skul ban hikai, hynrei ki shu ainong ha kiwei pat ban hikai, bad ki don pat ki nonghikai kiba shu leit hikai da kaba pud sngi.
U la ong ba ki skul Sorkar ki dei ban biang bha ha ka jingai jingshakri namarba kiba bun hi ki skul Sorkar ki ïoh ïa ki nonghikai kiba shah hikai pyntbit.
U Rakkam u la pyrto ruh ïa ki skul shimet kiba la ai jingshakri bad ïarap ban kyntiew lang ïa ka pule ka puthi wat la ki nonghikai ki ïoh tulop kham rit.
U la ong ba ki don ki skul Sorkar kiba lehbha shisha ha ka jingai jinghikai bad wan shakhmat, ym ba baroh ki skul Sorkar kim shym la leh bha.
