Shillong, Ïaïong 25:
U Symbud Myntri Rangbah uba peit ïa ka tnat Pulit, u Bah Prestone Tynsong u la ong ba u pyntikna ba don “zero level” ha Jylla bad da kaba tyngeh yn shim ïa kiba leh beaiñ kum ka jingtih bad shalan dewïong beaiñ.
U Bah Prestone u la ong ba naduh basdang, ka thong jong u ka long kaba shai kdar la ka dei ha ka por ka Sorkar kaba la leit, ne ka Sorkar kaba mynta, kita ki “high level” kim dei ban don bad kim don hi ruh, bad un pyntikna ba ki don ki “zero level” ha baroh kawei ka Jylla.
Kane ka jingong u Bah Prestone ka la wan ruh hadien ba u MP ka Shillong u Bah Vincent H Pala u la ïaroh ïa u da kaba ong ba naduh ba peit u Bah Prestone ïa ka tnat pulit, kita ki “high level” ki la kut bad kim don shuh namar kiba shalan dewïong ruh ki dei kiba la don challan katkum ka jinglilam ïa u dewïong da ka Coal India Limited.
Halor ka hukum ka Meghalaya High Court ban phah pahara 10 pyrton ki pulit Central Armed Police Force (CAPF) ban khanglad ïa ka jingshalan dewïong beaiñ bad tih dewïong beaiñ, u Bah Prestone u la ong ba ka Sorkar Jylla ka la thoh sha ka Sorkar Pdeng katkum ka hokum jong ka Ïingbishar ban phah da ki pulit Central Industrial Security Force (CISF) bad mynta da ki pulit CAPF, hynrei um don jingtip la ka Sorkar Pdeng kan pynbiang ne em ïa kine ki pulit pahara.
Ha kawei pat ka liang, u Bah Prestone u la ong ba ka jingong ba don ka jingshalan dewïong beaiñ kam don shuh bad u la maham da kaba shai ba kino kino kiba donkti ban leh beaiñ, kin shah kurup bad ngat katkum ki kyndon jong ka aiñ.
