Kyiv, ïaïong:
Ka khubor ba la ioh lum ka iathuh ba ka kynhun ialehkai phutbol ki shynrang ka ri Ukraine ka pynkhreh mynta ha ka ban iai bteng ia ki jingiakhun ki jong ka ha ka rynsan iaknieh rung sha ka European Championship ka ban sa long ha u snem ban wan, wat la ka sorkar jong ka nongbah Kyiv katei ka ri ka la khang pyrshah ia ki kynhun ialehkai katei ka ri ban shimbynta ha kino kino ki lympung ialehkai ba iadonlang ki nong-ialehkai na ka ri Russia bad Belarus.
Nalor kata, ka khubor ka iathuh ruh ba ka nongbah Kyiv ka la wanrah ia katei ka jingkhang pyrshah ban shimbynta ki nong-ialehkai katei ka ri kaba kynthup naduh ha ki lympung ialehkai Olympic, non-Olympic bad Paralympic ruh kumjuh. Kane ka dei halor ka jinghiar thma jong ka ri Russia ia ka ri baroh kawei bad katei ka ri kaba hiar thma ka la pyndonkam ruh ia ki pyrton shipai jong ka ri ba marjan; ka Belarus na ka bynta ban iai pynkhlain shuh shuh ia ka jingthombor.
Na ka liang jong u Andriy Pavelko; khlieh nongialam ka Ukrainian Football Association u lah pyllait ia ka shithi kaba pynpaw ba ka kynhun Myntri jong ka tnad ialehkai ka lah pruid dak mynta ia ka rai jong ka na ka bynta ban shah ia ka kynhun ialehkai phutbol ka ri Ukraine ban shimbynta ha ki rynsan iaknieh rung jong katei ka lympung wat la ka kynhun ialehkai na Belarus ruh kan shimbynta.
Kumba ka paw hi ka long ba ka group C ha kaba ka Ukraine ka lah shah buh na ka bynta kata ka rynsan iaknieh rung sha ka lympung, ka kynthup ia ka kynhun ialehkai na England, Italy, North Macedonia bad Malta bad ka Belarus ka don ha ka Group I lem bad ka Israel, Andorra, Kosovo, Romania bad Switzerland.
Ha ka jing-ialehkai ba nyng-kong jong ka Ukraine kaba lah shah rem noh da 2-0 kol ha ka England; ka kynhun kaba lah ialam nakhmat ia ka group baroh kawei da 6 dor-thong hadien ki ar jingialehkai, kumta ruh ka Ukraine kan pynkhreh sa na ka bynta kaba ar jong ka jingleit iakhun jong ka Shabar na-la-iing pyrshah ia ka North Macedonia ha ka 16 tarik u Jylliew.
