Shillong, Ïaïong 25:
Hadien ka jingtwa ha Rngaiñ namar ka jingtih surok kaba la shim ïa ka jingim jong ar ngut ki briew, ka Sorkar Jylla ka la pynbna ba ki bor bahalor ka National Highways & Infrastructure Development Corporation Ltd (NHIDCL) ki la pynkut noh ïa ka jingïateh bad ka kompani ARSS kaba pyntrei ïa ka surok naduh Mylliem sha Pynursla Bypass kaba hap ha ka Package-II.
U Symbud Myntri Rangbah uba peit ïa ka tnat shna surok, u Bah Prestone Tynsong u la ïathuh ba na ka liang ka NHIDCL ruh ka dang pynkhreh ïa ki buit bad ki lad kumno ban ïada na ka jingtwa ha Rngaiñ haba bteng ïa ka jingpyntrei ïa kane ka surok Shillong-Dawki.
Hadien ka jingïalang kaba u la pynïaid ha kamra treikam jong u, u Bah Tynsong u la ong ba la ïakren kham sani haba ïadei bad ka jingtwa bad ki jaka ba ju jia ka jingtwa kaba khah khah ha kaba la dep ban ithuh lypa ïa kum kita ki jaka bad kumno ban shim ki lad ïada khamtam namar ka long kaba ishyrkhei mynta ba la dei ka aïom slap.
Ha kane ka jingïalang, la ïakren ruh halor ka package-I, package-4 bad package-5 ban pyntrei ïa ka surok ha kaba la phah ïa ka NHIDCL ban khot ‘tender’ biang na ka bynta kine ki song (package) kiba dang sah jong ka surok Shillong-Dawki.
U la ong ba ki briew kiba tip bha ïa ki jnit ki jnat kiba dei jong ka NHIDCL kin pynkhreh ïa ki lad kumno ban ïaid shakhmat bad ban buh ruh ka kynhun kaba yn don beit baroh 24 kynta ha kano kano ka por ba mih ka jingdonkam kyrkieh.
U la ong ba ka NHIDCL ka la pyntip ba la pynkut ïa ka jingïateh bad ka kompani ARSS namar ki kam kim shym la ïaid sted shakhmat.
Kumba ka long mynta, ki kali ki la ïaid lyngba ka jaka ba twa ha Rngaiñ bad ka jingpynkhuid ïa ka surok ka bteng tang ha ka por mynmiet, bad na ka liang ka ophis Pynursla SDO Civil ka la pyrkhing ïa ka jingïaid ki kali ha ka por mynmiet.
U Bah Prestone u la ïathuh ba la bthah ruh ïa ka NHIDCL ban buh da ki briew kiba tip bad shemphang kiba dei na Geological Survey of India bad IIT Guwahati bad ïa kane ruh ka la nang leh.
