Jowai, Ïaïong 25:
Ka Regional Committee na bynta ka West Jaiñtia Hills District ka la sdang ïa ka wat kaba nyngkong ban shong jingïalang na ka bynta ka jingïakren pynbeit pud ïa ki jaka kiba don hapdeng ka jingïakajia kiba hap hapoh ka West Jaiñtia Hills District.
Ïa ka jingïalang la pynlong ha kamra jingïalang (conference hall) ka shlem treikam u Deputy Commissioner, ka West Jaiñtia Hills District ha nongbah Jowai ha ka Sngi Ba-ar.
Ïa kana ka Regional Committee la khlieh da u Symbud Myntri Rangbah ka jylla, u Bah Sniawbhalang Dhar kum u Chairman, u Bah Comingone Ymbon kum Vice Chairman ha ka jingdonlang ki dkhot kiba kynthup u Chief Executive Member ka JHADC, u Bah Thombor Shiwat, u MDC Bah Aiborlang Shadap bad ki bor pynïaid District kiba kynthup ïa u Deputy Commissioner u Bah BS Sohliya bad u ADC u Bah M.A. Challam.
U Chairman ka Committee u Bah Sniawbhalang Dhar haba kren sha ki lad pathai khubor hadien ba la wai ka jingïalang u la ong, ba kane ka dei ka wat kaba nyngkong katkum ka ‘notifications’ ba thymmai jong ka Sorkar Jylla.
Kum ka jingsdang, u la ong ba na ka liang ka committee kan pyrshang ban shim lut ki jingtip shwa ban phah baroh sha ka sorkar Jylla.
U la ong ba ka committee ka la bthah ruh ïa ka bor District ba kan sdang noh ban leh ïa kaei kaba ki dei ban leh na bynta kano kano ka jingdonkam jong ka sorkar.
