Shillong, Ïaïong 25:
Ka jingpynmih da ki ’rang ïalehkai ki bym dei kam pat shym la kut ha ka lympung ïalehkai Under-18 Inter School League 2022-23, ha kaba na ka liang ka Shillong Cricket Association ka la hap ban pynduh ïalehkai ïa ka Little Angels School.
Kat kum ka kyrwoh na ka SCA la ong ba ka Little Angels ka la pynmih da ki ’rang ïalehkai bym dei ha ka jingïakhun pyrshah ïa ka St Xavier’s.
Kumta na ka liang katei ka synjuk ba pynïaid ïa ka jingïalehkai kriket ka la pynduh ïalehkai ïa ka Little Angels School tang mynta ka sien bad ka la rai jop ïa ka St. Xavier’s.
Ha kawei pat ka jingïakhun, ka Laban Bengali Boys ka la khur ïa ka jingjop hadien ba pynliem ïa ka St. Edmunds School da 10 wiket.
Ha kane ka jingïalehkai ka St. Edmund’s ka la kam trai ban tied nyngkong ha kaba ka la kamai 56 run bad shah pynkhyllem 5 wiket ha ki 15 over. U Abhineet Dey u la tied 19 run na ki 32 bol bad u Vedanth Nadera u la ïoh tang 6 run na ki 15 bol. Katba u Rohan Kr Ram bad u Dipankar Barua ki la khur mar shi wiket na ka bynta ka Laban Bengali.
Haba wan shimti ïa ka pali ba ar, ka Laban Bengali Boy’s ka la kynjoh sha ka thong da kaba kamai 57 run bad ha ki 4.2 over. U Dipankar Barua u la tied 36 run na ki 16 bol bad u Swarnajyoti Ray u la ïoh 11 run na ki 10 bol. Ïa ka nam ‘Man of the Match’ la khur da u Dipankar Barua.
Haba phai sha kawei pat ka jingïakhun kaba lai hapdeng ka BSF Secondary School bad ka Shillong Secondary School la hap ban pynsangeh noh na ka daw ka jingshah pynthut ha u slap. Kumta kine ki kynhun ki hap ban ïasam mar 1 dor-thong (point).
