Shillong, Ïaïong 25:
U nongsaid aiñ ba rangbah ka Jylla, u Bah V.G.K. Kynta u la ong ba dei tang ka mukotduma ‘Civil Suit’ kaba lah ban pynseisoh ïa ka jingthmu ka Sorkar ban pynkynriah ïa ki briew kiba shong ba sah ha Them Ïew Mawlong.
“Da lei-lei ruh phin ym lah ban kyndang ïa kine ki briew. Ka dei tang ka ‘Civil Suit’ kaba lah ban seisoh. Nga la dep ong ba u nongbishar ba marwei, u Justice S.R. Sen (uba la shongthait), u la ai ka hukum ba lada donkam ban weng ïa kine ki briew, hap ban leit lyngba ka ‘Civil Suit’,” la ong u Bah Kynta haba kren sha ki lad pathai khubor ha ka Sngi Ba-ar.
Haba kdew ba ka jingthmu ban kyndang ïa kitei ki briew kan long ka kam kaba eh, u la ong ba shisien ba la dakhol, ym tang 10-20 snem, hynrei palat ïa ka 150 snem (ki lah dakhol), kam dei shuh ka kam kaba suk.
“Mynta ban pynithuh mano kiba dei hok kiba shong ba sah ha katei ka jaka na ka liang ki nongtrei ka Municipal bad ban pynithuh mano ba dei kiba shong be-aiñ, ka dei ka kam bah-kam san kaba shitom bha ban pyrkhat,” u la ong.
U Bah Kynta u la ong ruh ba jyn lada u long u nongaibuit ha ka liang ka aiñ jong kitei ki briew (Harijan), lehse un jyn da la don kata ka jingïakren kaba sani bad ka Sorkar, bad lehse ban kohnguh ïa kaei kaba ka Sorkar ka tyrwa namar ha kaba khatduh, baroh ki kwah ban don ka jingsuk ha ka ïaid ka ïeng na Them Ïew Mawlong nalor ka jingpynheh ïa ki surok kumjuh ban don ïa ka jaka pynïeng kali kaba itynnad ha katei ka jaka.
“Ym dei ban don ka jingbym shimkhia, peit sha Assam, UP, lada don kino-kino kiba sah be-aiñ, peit tang ha Assam…ki kyndang beit. Hangne hi, nga ïohi ba ka Sorkar ka tlot bad ka don kata ka jingsuki…nga sngew ba haba kut hi kam myntoi ban suki palat,” la ong utei u nongsaid aiñ.
Haba pynsngew ba shisien ka por, ka Them Ïew Mawlong ka dei ka jaka jong ka Kur, u Bah Kynta u la ong ba lehse ha kato ka por, u Syiem Mylliem haba ai sha ka Sorkar, u ju mihkhmat na ka liang jong ka Kur.
“Nga sngew ba lada mih ka jingeh kaba khraw palat, kaba biang eh ka long ban ujor da ka ‘Civil Suit’. Kito kiba dei hok ban mih, ki dei ban mih ban sah ha ka jaka ba la pynbiang ka Sorkar,” u la ong.
Shuh shuh haba kylli, u la bynrap “Ka jingshong suk shong shngaiñ ka dei ka kamram jong ki bor pynïaid distrik ka Sorkar Jylla…nga sngew ba kiei-kiei kiba dei ban leh, dei ban leh katkum ka aiñ. Kam dei ban mih kano-kano ka jingthut ha ka shong suk shong shngaiñ…kaei kaba hap ban leh hap pynbeit lyngba ka aiñ.”
