Beirut, Iaiong:
Ki shipai ka Israel ha ka Sngi Nyngkong ki la ther ‘namding sha ki bynta ba don ki kynhun lehnoh ka Iran kaba don ha ka thaiñ South jong ka Syria hajan u khppud bad ka Israel. Kane ka long ka jingther bom ba 2 jong ka Israel pyrshah ia katei ka ri ba marjan.
Ka tnat Observatory for Human Rights jong ka Syria ka la iathuh ba ki shipai ryngkew jong ka Israel ki la ther bom sha ki bynta khappud jong ka Quneitra ha katei ka sngi.
Ia katei ka kynhun ehrang Hezbollah ba la ioh jingkyrshan na Iran, la seng khnang naka bynta ban leit thombor ha ki bynta khappud jong ka Israel.
Watlakatta, la ong ba na ka liang jong ka Syria, kam shym la ai jubab eiei halor katei ka jingjia ha katei ka sngi.
La ong ba ki shipai ka Israel ki la ther bom teng ha Quneitra ha ka 18 tarik jong une u Iaiong, ha kaba katei ka kynhun lehnoh ka don.
Kumjuh ruh ha u bnai ba la leit, ka Israel ka la pynphai kylliang ia ka Syria hadien ba shibun tylli ki ‘namding ki la wan her bad bthei shapoh u pud- u sam jong ka Israel na ka liang jong ka Iran.
La ong ba ha ki phew snem ba la leit jong ka jingkhie ka thma poh iing hapoh Syria, ka Israel pat ka la ther ‘namding bad ther bom da ki spah sien shapoh u pud- u sam jong ka Syria, ha ki jaka ba don ki kynhun lehnoh bad kumjuh ruh sha ki jaka ba don ki bor pahara bad ki shipai jong ka Syria.
La ong ba ka tnat shipai jong ka Syria ka la ioh knieh biang ia ka bor synshar ha ka thaiñ South jong ka Quneitra hapdeng jong u snem 2018, bad tang hadien 5 snem kitei ki kynhun lehnoh ki la ioh knieh bad synshar biang ia kitei ki bynta jong ka Syria tad haduh kine ki sngi ba mynta.
