Shillong, Ïaïong 25:
U MLA ka South Shillong bad uba long ruh u Chairman ka MTDC, u Bah Sanbor Shullai, ha ka Sngi Ba-Ar u la bthah ïa ka tnat PHE ba kam dei ban pyllait ïa ki ‘bill’ jong ki kontraktor ki bym pyntrei ïa ki kam ha ki dong bapher bapher jong ka South Shillong konstitwensi katkum ki kyndon ba la buh.
Ïa kane, u Bah Sanbor u la bthah ha ka jingïalang kaba u la lum bad ki ophisar ka tnat Information Technology & Communication, pulit, PWD, PHE bad Municipal Board ban peit bniah ïa ka jingpyntreikam ïa ki projek hapoh ka AMRUT bad kiwei ha South Shillong konstitwensi ha ka jingdonlang jong ki nongkitkam jong ki Dorbar Shnong kiba hap ha kane ka konstitwensi.
La ïakren halor ka jingpyndait ïa ki VMD, CCTV, Smart Pole ECB & PAS, ka skhim umbam hapoh ka AMRUT, bad ka jingmaramot ïa ki surok.
U Bah Sanbor u la kyntu ïa ki Dorbar Shnong ban ïarap ïa ka tnat pulit khnang ba yn lah ban buh bun tylli ki CCTV bad ba ïa kine dei ban peit da ki Dorbar Shnong. Ki pulit ki la ai jingmut ïa ki nongdie dukan bad ki ïing ki sem ba kin buh da ki CCTV khnang ba kan kham pynsuk ïa ka jingïakhun pyrshah ïa ki runar. Ki la ong ba ki pulit ki la lah ban thwet ïa kiba bun ki runar tang lyngba ka jingïarap jong ki CCTV.
Na ka liang u MLA u la ai por hynriew bnai ïa ka PHE bad Municipal Board ban pyndep ïa ka jingpyntreikam ïa ka skhim sam um hapoh ka AMRUT. Ha kajuh ka por, u la bthah ïa ka tnat PHE ba kam dei satia ban pyllait ïa ki ‘bill’ jong ki kontraktor kiba pyntrei ïa ki skhim ha South Shillong khlem da bud ïa ki kyndon ba la buh.
Shuh shuh u Bah Sanbor u la bthah ïa ka tnat PWD ba kan maramot noh mardor ïa ki surok kiba la bun sa da ki thliew ki syar, bad ban peit kino ki surok kiba la donkam ban maramot ha South Shillong.
