Shillong, Ïaïong 26:
U President ka Meghalaya Football Association (MFA) u Bah Larsing Ming Sawyan u la pynpaw ba ka long kaba kongsan ban pynlong ïa ka ‘Golden Baby League’ ha man la ki district jong ka Jylla.
“Dei ka MFA kaba la lah ban pynlong ïa ka Golden Baby League ha u snem 2018 bad hadien ka All India Football Federation (AIFF) ka la pynlong ïa kane ka lympung ïalehkai ki hehrit ha kylleng jong ka ri,” la ong u Bah Sawyan ha ka jingpyllait ïa ka shap ne logo bad ka trophy na ka bynta ka Meghalaya State League (MSL) ha ka Sngi Balang.
“Lada ym lah ban pynlong ïa kum kine ki lympung ïalehkai jong ki heprit (grassroot) kan ym lah ban kyntiew ïa ka jingïalehkai phutbol. Lada ngi shu pynlong tang ki lympung jong ki kyrdan ïalehkai ba la san (senior) ngin ym lah ban pynurlong ïa kaei kaba ngi kwah,” la bynrap u Bah Sawyan.
“Te kumta ka jingïohi jngai ka MFA ka long ba naduh u snem ban wan dei ban sdang noh ïa ka Golden Baby Leagues ha kylleng ki district. Lada ngi la lah ban pynurlong ïa kane ka jingthmu ngin sa lah ban pynurlong ïa kaei kaba ngi kwah kum ki ’riew phutbol.”
Ha kajuh ka por ka jingïohi jngai ka MFA ka long ruh ban kyntiew ïa ka jingïalehkai jong ki kynthei. “Ka kynhun ki ’thei ïalehkai ka la don ha ka kyrdan kaba 50 ban ïa ka kynhun jong ki shynrang, bad kane ka don jingkyrmen ban ïoh ïalehkai ha ka World Cup bad ka Meghalaya ka dei ban ïadon bynta lang ha kane ka jingïaid lynti.”
