Shillong, Ïaïong 26:
U MLA ka North-Shillong, Bah Adelbert Nongrum u la ai por 15 sngi ïa ka Sorkar Jylla ban pynkynriah ïa ki briew kiba shong ba sah ha Them Ïew Mawlong lym kumta um banse ban shim da kiwei pat ki sienjam.
“Na ka liang jong nga kum u nongmihkhmat, ngim lah shuh ban shu sngap, katto ka la biang…nga sngew ba ka Sorkar ka dei ban shimkhia ba hapoh 15 sngi ngi dei ban ïohi ïa kiei-kiei ki dak ba kan don ka jingkylla haba ïadei bad kane ka bynta,” la ong u Bah Nongrum ha ka Sngi Balang.
“Hapoh 15 sngi lada ngam ïohi ban don kano-kano ka jingkylla halor kane ka bynta ban pynkynriah ïa ki mardor bad ban weng noh ïa ka jingker na Them Metor, kan pynbor ïa nga ban ïaid da kawei ka lynti kaba ngan hap shim ïa ka rai kaba ngan sa pynbna pat,” u la ong.
Haba kdew ba katei ka jaka (Them Ïew Mawlong) ka hap hapoh ka konstitwensi jong u, u la ong ba u don ka hok ba un ïai buddien bad u nym shongthait namar katei ka mat kam dei halor ka jingisih ïa ki briew kiba sah ha katei ka jaka.
“Mynta la ïaid la 5 snem tam, ka long ka jinglehraiñ hakhmat ka Jylla hi baroh kawei ba tang ine i mat, na ka liang ka Sorkar kam lah ban pynkut namar dei ma ka, ka kmie ka ban peit na bynta ka bit ka biang jong baroh ki liang. Kane ka jingdawa ka mih ruh hadien bun ki jingjia na ka por sha ka por kiba har rukom bad kiba pyntieng pynsyier ïa ka imlang-sahlang,” u la ong.
Ha kajuh ka por, u la pynsngew ba ka koit ka khiah kam long kaba biang na bynta ki briew kiba shong ba sah ha katei ka jaka.
Haba pynpaw ka jinglyngngoh halor ka jingpynslem ka Sorkar, ha kawei ka liang kaba pynlong ruh ïa ka Harijan Panchayat Committee (HPC) ban pyneh na ka por sha ka por, u MLA u la ong, “Kane ka long kumba ki pyneh ïa ka Sorkar, pyneh ïa ka ïingbishar bad ka jingtuklar jong ka ïingbishar ruh, nga nud ban ong ba ka dei ka jinglong jem palat jong ka Sorkar ka bym shym la nud ban shim ïa ka rai namar kane ka dei ka jingangnud ym tang jong ka konstitwensi, hynrei jong ka Jylla baroh kawei.”
Kumjuh, haba pynkynmaw ba katei ka mat ka dei kaba la slem bah, u Bah Nongrum u la ong ba ka jingnang pynslem jong ka Sorkar ka dang wanrah pynban ïa ki jyrwit-jyrwat.
“Ka Sorkar kam dei ban sngap shuh, ka dei ban leh da kaba tyngeh. Ka dei ban pynkynriah noh shi syndon khlem da ai lad ba kin pyneh ne pyni la ki jong ki daw namar ki dei ki nongtrei, ki shakri jong ka Sorkar,” u la ong.
Na ka liang utei u nongmihkhmat u la ong ruh ba ka Sorkar ka dei ban ai hukum ïa ki nongtrei kiba trei ha ki tnad treikam bapher-bapher (kiba sah ha katei ka jaka) bad ban phah ïa ki sha ki jaka sah jong ka Sorkar, katba ïa kito kiba sah be-aiñ, ka Sorkar “ka la tip kaei kaba ka dei ban leh”.
Haba pynsngew ba ka jingker kut ïa katei ka jaka (Them Ïew Mawlong) ka la ktah shi kat dei ïa ka dheng kali, ka ïaid ka ïeng, ka leit ka wan bad ka jingim ba man ka sngi ha nongbah, u Bah Nongrum u la ong ba ka Sorkar ka dei ban shim ka jingkitkhklieh halor katei ka bynta.
Shuh shuh u la bynrap, “Kine ki 2 tylli, kaba nyngkong – ban pynkynriah ïa ki briew kiba shong ba sah ha katei ka jaka katkum ki kyndon jong ka aiñ bad dei ban phah ïa ki sha ki jaka sah ba la pynbiang na bynta jong ki da ka Sorkar bad kaba ar – mar-mar khlem da pynslem, ban weng noh syndon ïa katei ka jingker kaba la ktah shi kat dei ïa ka ïaid ka ïeng bad ka shnong baroh kawei.”
